🔴 Н.Учрал: Өмнөх сайд нарын ажлын гүйцэтгэлийг харж байж улираан ажиллуулах эсэхийг шийднэ

Ерөнхий сайд Н.Учрал Засгийн газрын бүтэц, бүрэлдэхүүн болон цаг үеийн тулгамдсан асуудлуудаар мэдээлэл өглөө. Тэрбээр одоогийн нөхцөл байдлыг туйлын хариуцлагатай цаг хугацаа хэмээн тодорхойлж, төрийн ажил тасралтгүй, шуурхай үргэлжлэх ёстойг онцлов.

Засгийн газрын зүгээс салбарын сайд нар болон Төрийн нарийн бичгийн дарга нарын ажлын гүйцэтгэл, үр дүнтэй өчигдрөөс эхлэн танилцаж дуусжээ. Салбар бүрт хийгдсэн ажлын ахиц дэвшил, олон улсын харилцааны хүрээнд хүлээгдэж буй томоохон төслүүдийг харгалзан үзэж, зарим сайд нарыг улируулан ажиллуулах шаардлагатай гэж үзэж байна. Энэ нь зөвхөн дотоод асуудал биш, олон улсын түвшинд байгуулсан гэрээ хэлцэл, тухайлбал ОХУ-тай хийх агаарын хөлгийн түлшний асуудал зэрэг нэн яаралтай шийдвэрлэх ажлуудтай шууд холбоотойг тайлбарлалаа.

Шинэ Ерөнхий сайд томилогдсоноор өмнөх Засгийн газар бүрэн бүрэлдэхүүнээрээ огцордог Үндсэн хуулийн зохицуулалттай. Одоогоор Засгийн газар бүрэн бүрэлдэж амжаагүй байгаа тул Ерөнхий сайд өөрөө хуулийн төслүүдийг УИХ-д танилцуулж байна. Тэрбээр "Бидэнд шинээр суралцах, бүхнийг тэгээс эхлэх цаг хугацаа байхгүй. Тиймээс салбарын сайд нарын ажилдаа хандсан хандлага, гүйцэтгэлийн тайланг үндэслэн шийдвэр гаргана" гэлээ.

Төсвийн хүрээний мэдэгдлийг ирэх тавдугаар сарын 1-ний дотор өргөн барих хуулийн хугацаа тулсан нь Засгийн газрыг яаралтай бүрдүүлэх гол шалтгаануудын нэг болж байна. Хэрэв энэ хугацаанд амжиж төсвийн хүрээгээ боловсруулан, жилийн төлөвлөгөөндөө өөрчлөлт оруулахгүй бол ирэх оны төсвийн мөчлөг алдагдах эрсдэлтэй. Мөн яамдыг нэгтгэх зэргээр бүтцийн томоохон өөрчлөлт хийх нь төсвийн тодотгол ойр ойрхон хийх нөхцөлийг бүрдүүлж, төрийн албанд хөдөлгөөн, тогтворгүй байдал үүсгэх талтай гэв.

Эдийн засгийн хэмнэлтийн хүрээнд төрийн албаны 3000 орчим сул орон тоог чөлөөлж, зардлыг танаж байгаа аж. Түүнчлэн тавдугаар сарын 31-н гэхэд зарлагдаагүй тендерүүд цуцлагдах хуулийн заалттай. Нийт 1.3 их наяд төгрөгийн хөрөнгө оруулалтын зардлаас одоогоор ердөө 300 орчим тэрбум төгрөгийн ажил эхэлсэн байгаа тул орлого тасарсан тохиолдолд төсөвт тодотгол хийхээс өөр замгүй болохыг тэрбээр онцлов.

Улс төрийн намуудын хамтын ажиллагааны тухайд, одоогоор "ХҮН" намд хамтран ажиллах урилга хүргүүлээд байгаа бөгөөд энэ асуудлыг намын Удирдах зөвлөлд танилцуулж, УИХ дахь бүлгийг өнөөдөртөө багтаан хуралдуулахаар төлөвлөж байна.

Төгсгөлд нь Туулын хөндий дэх замын асуудал болон хотын удирдлагуудын ёс зүйн асуудлаар ажлын хэсэг ажиллаж байгаа бөгөөд Ёс зүйн хороогоор хэлэлцэх болно гэв. Ерөнхий сайдын зүгээс Хотын даргад энэ асуудлаар албан ёсоор анхааруулга өгсөн байна.