🔴 УИХ-ын гишүүн Ч.Лодойсамбуу: Ардын намыг хамгаалагч манай намын ах нар засагт орно гээд явж байна

УИХ-ын гишүүн, АН-ын бүлгийн дэд дарга Ч.Лодойсамбуу намын дотоод нөхцөл байдал болон бүлгийн даргыг солихтой холбоотой асуудлаар байр сууриа илэрхийллээ. Тэрбээр намын дарга болон бүлгийн дарга тусдаа байх нь зарчмын хувьд зөв боловч өнөөгийн нөхцөл байдалд энэ асуудлыг хөндөх нь цаг үеэ олоогүй бөгөөд улс төрийн ашиг сонирхол агуулж байна гэж үзэж байна.

АН-ын зарим гишүүд бүлгийн даргыг огцруулах санаачилга гаргаж, гарын үсэг зурж байгаа талаарх мэдээлэлд Ч.Лодойсамбуу тайлбар өгөхдөө, "Намын дарга, бүлгийн дарга хоёр тусдаа байх зарчмыг манай намын удирдлагууд анхнаасаа үгүйсгээгүй. Гэвч яг одоо Засгийн газар шинээр байгуулагдаж байгаа энэ эгзэгтэй үед бүлгийн даргыг солих асуудлыг зарим гишүүд гаргаж ирж байна. Хэвлэлээр явж байгаа нэрсүүд бодит байдлаас нэг их зөрөхгүй болов уу" гэлээ.

Тэрбээр энэхүү үйлдлийг АН-ын бүлгийн нэгдмэл байдлыг сарниулах, хүчтэй сөрөг хүчин байх боломжийг хязгаарлах гэсэн оролдлого хэмээн тодорхойлов. АН-ын бүлэг сүүлийн үед нягтарч, Засгийн газарт хариуцлага тооцох, шаардлага тавих зэргээр идэвхтэй ажиллаж эхэлсэн нь эрх баригч намын хувьд эрсдэл дагуулж байгааг тэрбээр онцолсон юм. Тиймээс бүлгийг дотроос нь задлах замаар эрх баригчдад ашигтай шийдвэр гаргуулах сонирхол зарим "наймаачин" гишүүдэд байна гэж хардаж байгаагаа нуусангүй.

Ч.Лодойсамбуу: Бүлгийн даргыг өөрчлөх оролдлого бол эрх баригчдыг хамгаалах гэсэн "наймаачдын" үйлдэл

"Өнгөрсөн хугацаанд Үндсэн хуулийн өөрчлөлт болон бусад чухал асуудлаар бүлгийн шийдвэрээ дагалгүй, ирцэд орохгүй байсан хүмүүсийг харахад л хэн наймаа хийж явдаг нь тодорхой харагдана. Тэр хүмүүс одоо дараагийн наймаагаа хийж, Ардын намын Засгийн газрыг хамгаалж үлдэхийн тулд бүлгийн даргыг солих асуудлыг ярьж байна" хэмээн Ч.Лодойсамбуу гишүүн шүүмжлэв.

Мөн АН Засгийн газарт хамтрах тухай яриаг тэрбээр эрс үгүйсгэлээ. Түүний хэлснээр, МАН жилийн өмнө АН-ыг засагас хөөж гаргасан шийдвэрээ гаргачихсан тул дахин урих боломжгүй, АН-ын зүгээс ч засагт орох сонирхолгүй байгаа аж. Харин зарим гишүүд Ерөнхий сайдын өрөөгөөр орж гарч байгаа нь харамсалтай бөгөөд энэ нь намын нийтлэг эрх ашиг биш, хувь хүний ашиг сонирхол гэдгийг тодотголоо.

Эцэст нь тэрбээр, АН хүчтэй сөрөг хүчин байх нь төрийн хяналт, тэнцвэрт байдалд асар их хэрэгтэйг онцлоод, "Сөрөг хүчин сайн байвал төрийн шийдвэр зөв гардаг. Бид эрх баригчдын буруу шийдвэрийг зогсоож, зөв зүйлийг нь дэмжээд явах зарчимтай байх ёстой. Одоо бүлгийн даргыг солих гэж яарах шаардлага байхгүй" гэсэн байр суурьтай байгаагаа илэрхийлэв.