🔴 Ард түмний хөрөнгийг "дээрэмдсэн" Э.Бат-Амгалан дахин сайд болохоор гүйж явааг эсэргүүцэж байна

"Зэс эрдэнийн хувь" ХК-ийн хувьцаа эзэмшигчид эрх ашгаа хамгаалахаар Төрийн ордны гадна сар гаруй хугацаанд тайван жагсаал зохион байгуулж байна. Жагсагчид УИХ-ын гишүүн А.Бат-Амгалан болон түүний төрсөн дүү А.Батбаяр нарыг компанийн хөрөнгийг хувьдаа завшиж, хувьцаа эзэмшигчдийг хохироосон гэж буруутган, тэднээс тайлбар нэхэж байгаа юм. Гэвч өнөөдрийг хүртэл холбогдох албан тушаалтнууд иргэдтэй уулзаж, тодорхой хариу өгөөгүй байгааг тэд шүүмжиллээ.

Жагсагчдын зүгээс А.Батбаяр болон түүний хамаарал бүхий этгээдүүдийг компанийн 70 тэрбум төгрөгийг хувьдаа завшиж, үйлдвэрийн үйл ажиллагааг зогсоосон гэж мэдэгдлээ. Үүнээс үүдэн 700 гаруй ажилтан ажилгүй болж, 24,500 гаруй хувьцаа эзэмшигч олон жилийн турш хүлээсэн ноогдол ашгаа авч чадахгүй хохирч байгааг тэд онцолж байна. Тэдний гол шаардлага бол завшигдсан гэх 70 тэрбум төгрөгийг компанид буцаан төвлөрүүлж, үйлдвэрийг хэвийн ажиллагаанд оруулах явдал юм.

Жагсаалд оролцож буй иргэдийн дийлэнх нь Эрдэнэт хотын анхдагч бүтээн байгуулагчид болох ахмад настнууд байв. Тэд 16 жилийн турш хувьцааныхаа үр шимийг үзэхийг хүлээсэн боловч ийнхүү гудамжинд тэмцэхээс өөр аргагүй байдалд хүрсэндээ гомдолтой байгаагаа илэрхийлэв. Хувьцаа эзэмшигчдийн төлөөлөл хэлэхдээ, "Биднийг анх ирж зогсоход доромжлох хандлага гаргаж, хүмүүс явуулж дарамталж байсан түүх бий. А.Бат-Амгалан гишүүн ард түмнийхээ өмнө гарч ирж уулзах ёстой. Тэр төрд байх эрхгүй хүн" хэмээн байр сууриа илэрхийллээ.

Одоогийн байдлаар хувьцаа эзэмшигчид АТГ болон Прокурорын газарт гомдол мэдүүлсэн боловч хэргийг шийдвэрлэх явц удаашралтай, тодорхой хариу ирэхгүй байгааг хэлж байна. Тэд Төрийн гурван өндөрлөгт хандан энэхүү асуудалд анхаарал хандуулж, хувьцаа эзэмшигчдийн өмчлөх эрхийг сэргээж, хууль бус үйлдэл гаргасан этгээдүүдэд хариуцлага тооцохыг шаардаж, тэмцлээ үргэлжлүүлнэ гэдгээ мэдэгдлээ.