🔴Ж.Батжаргал: Надад бүлгийн дарга хангалттай тул сайд болох гэж гүйхгүй

УИХ дахь МАН-ын бүлгийн дарга Ж.Батжаргал шинээр байгуулагдах Засгийн газрын бүтэц, бүрэлдэхүүн болон УИХ-ын даргыг томилох асуудлаар мэдээлэл өглөө. Тэрээр намын эрх бүхий байгууллага боловсон хүчний нөөцдөө тулгуурлан тодорхой саналаа боловсруулж, УИХ-д ирүүлсний дараа бүлэг хуралдаж, эцсийн шийдвэрээ гаргахыг тодотгов. Намын зүгээс асуудлыг шуурхайлах бодлого барьж байгаа бөгөөд өнөөдөр эсвэл маргаашдаа багтан томилгооны асуудлууд яригдаж дуусна гэж үзэж байна.

Томилгооны дарааллын тухайд хуулиар тогтоосон тусгайлсан процесс байхгүй ч УИХ-ын дарга болон Засгийн газрын гишүүдийг зэрэг оруулж ирэх нь зохистой гэж үзэж байгаагаа илэрхийллээ. Ерөнхий сайд Үндсэн хуулиар олгогдсон бүрэн эрхийнхээ хүрээнд Засгийн газрын гишүүдийн нэрсийг оруулж ирэх бол бүлгийн зүгээс УИХ-ын даргад нэр дэвшигчийг танилцуулах юм.

Засгийн газар бүрдэх процесс удааширч байна гэх шүүмжлэлд тэрээр тайлбар өгөхдөө, Ерөнхий сайд уржигдар шөнө батлагдсаныг сануулав. Мөн хуулийн дагуу дөрөвдүгээр сарын 1-ний дотор Засгийн газрын үйл ажиллагааны хөтөлбөр болон хөгжлийн төлөвлөгөөний хэрэгжилтийг УИХ-аар хэлэлцсэн байх ёстой зэрэг цаг хугацааны шахуу ажил байгааг дурдлаа. Шинэ Ерөнхий сайд томилогдсоноор өмнөх Засгийн газрын сайд нар хуулийн дагуу чөлөөлөгдсөн бөгөөд одоогоор дэд сайд, Төрийн нарийн бичгийн дарга нар салбарын ажлаа тасалдуулахгүй авч явж байна.

Түүнчлэн Ж.Батжаргал дарга өөрийг нь Шадар сайд эсвэл ЗГХЭГ-ын дарга болно гэх мэдээллийг албан ёсоор үгүйсгэлээ. Тэрээр "Би Засгийн газарт орохгүй. Надад УИХ дахь 68 гишүүнтэй том бүлгийг зохицуулж, авч явах хариуцлагатай үүргийг манай бүлгийн гишүүд итгэж хүлээлгэсэн. Тиймээс энэ ажлаа л хийнэ" хэмээн байр сууриа илэрхийлэв.

МАН-ын Удирдах зөвлөлийн хурлын товыг намын Ерөнхий нарийн бичгийн дарга гаргах бөгөөд тун удахгүй товлогдож, томилгооны асуудлууд эцэслэгдэнэ гэдгийг тэрээр нэмж мэдээллээ.