Т.УЛАМБАЯР: Б.ЭНХБАЯР МИНИЙ НАЙЗ Б.НЯМЖАВЫГ ДЭЭРЭМДСЭН

Иргэн Б.Цогтгэрэл Хууль зүй, дотоод хэргийн яамнаас "Эм Жи Эл" корпорацад олгосон 7.9 тэрбум төгрөгийн нөхөн төлбөртэй холбоотой асуудлаар шүгэл үлээгч Б.Уламбаяртай ярилцжээ. Т.Уламбаяр тухайн үед болсон үйл явдлын гэрч болсноо дэлгэрэнгүй ярьсан юм.

Б.Цогтгэрэл: Танд энэ өдрийн мэнд хүргэе. 2024 оны 3 дугаар сарын 29-ний өдөр та өөрийн цахим хуудсаараа дамжуулан Хууль зүй, дотоод хэргийн яамнаас олгосон 7.9 тэрбум төгрөгийн асуудлаар ноцтой мэдээлэл хийсэн. Та өөрийгөө танилцуулаад, "Эм Жи Эл" корпорацын захирал Нямжав болон Хууль зүйн сайд асан Б.Энхбаяр нартай холбоотой энэ асуудлын талаар тодорхой мэдээлэл өгөөч?

Т.Уламбаяр: Би Б.Нямжавтай 2004 оноос хойш 20 гаруй жил нөхөрлөж байна. Түүнийг ямар хөдөлмөрч, шударга хүн бэ гэдгийг, "Монгол хүн" компанийг хэрхэн босгож, амжилтад хүрснийг нь би сайн мэднэ. Сүүлийн үед Б.Энхбаяр сайдтай холбоотой янз бүрийн мэдээлэл гарч, Б.Нямжавыг сайдыг дарамталсан мэтээр гүтгэлэг тарааж байгаад миний инээд хүрч, дуугүй сууж чадсангүй. Үнэндээ бол Б.Нямжав өөрөө дарамтад орж, хохирогч болсон хүн юм.

Б.Цогтгэрэл: Найман тэрбум төгрөгийн асуудал яг ямар түүхтэй юм бэ? Хүмүүс Нямжавыг төрөөс үндэслэлгүй мөнгө авчихсан мэтээр ойлгоод байна шүү дээ.

Т.Уламбаяр: Энэ бол олон жилийн өмнөх асуудал. Лениний музейг "Үлэг гүрвэлийн музей" болгох төрийн шийдвэр гарахаас өмнө Б.Нямжав тэнд бизнесийн төсөл эхлүүлж, асар их хөрөнгө оруулалт хийчихсэн байсан. Гадаадаас үнэтэй материал татаж, зураг төсөл гарган, барилгын ажлаа эхлүүлээд явж байтал төр гэнэт шийдвэрээ өөрчилж, объектыг буцааж авсан. Үүнээс болж бизнес нь зогсож, банкны зээлийн хүүд баригдан 10 гаруй жил шүүхээр явж байж сая нэг нөхөн төлбөр авах шийдвэр гарсан юм.

Энэхүү ярилцлагыг видео хэлбэрээр үзэхийг хүсвэл ЭНД дарна уу

Б.Цогтгэрэл: Тэгвэл Б.Энхбаяр сайд энэ асуудалд яаж оролцсон хэрэг үү? Таныг бэлэн мөнгө өгч авалцах үед байсан гэж сонссон.

Т.Уламбаяр: Тийм ээ, би өөрийн нүдээр харсан гэрч нь. Б.Нямжав нэг өдөр над руу залгаад "Мөнгөө авахын тулд тодорхой хэмжээний мөнгө өгөхөөс өөр аргагүй байдалд орлоо, чи хүрээд ир" гэсэн. Би "Энэ чинь чиний авах ёстой мөнгө байтал яахаараа хүнд мөнгө өгдөг юм бэ?" гэхэд, "Ингэхгүй бол намайг дахиад 10 хэдэн жил гацаана гэж дарамтлаад байна" гэж хэлсэн. Тэр хүн шударга ёс тогтох үед намайг гэрч болоорой гэж дуудсан хэрэг. Хэрэв энэ нь зүгээр л авлигын хувь тохироо байсан бол намайг тэнд байлгахгүй, нууцаар хийх байсан биз дээ.

Б.Цогтгэрэл: Мөнгө өгөх үйл явдал яг хаана, хэзээ болсон бэ?

Т.Уламбаяр: 2024 оны 3, 4 дүгээр сарын орчимд Тусгаар тогтнолын ордны зүүн жигүүрийн 3 давхарт байдаг Б.Нямжавын оффист болсон. Маш том биетэй нэг залуу орж ирээд, дүүрэн бэлэн мөнгөтэй том спорт цүнхийг зүгээр л нэг тортой талх бариад гарч байгаа юм шиг аваад явсан. Тэр бол сайдын жолооч нь байсан. Гэтэл хэд хоногийн дараа "Мөнгө чинь 100 сая төгрөгөөр дутуу байна" гэж утасдаж дарамталсан гэж байгаа. Энэ бол үнэхээр увайгүй үйлдэл.

Б.Цогтгэрэл: Таны хэлж байгаагаар Б.Нямжав бол авлига өгөгч биш, харин төрийн өндөр албан тушаалтны дарамтад орсон хохирогч юм байна, тийм үү?

Т.Уламбаяр: Яг тийм. Төр иргэнийхээ бизнесийг дээрэмдэж зогсоочихоод, шүүхийн шийдвэрээр олгох ёстой мөнгийг нь өгөхдөө хүртэл "хувь" нэхэж дарамталдаг ийм тогтолцоо байж болохгүй. Б.Нямжав бол 20 гаруй жил хөдөлмөрлөж, зовж зүтгэж яваа бизнесмэн хүн. Одоо энэ асуудлыг хууль хяналтын байгууллага үнэн зөвөөр шалгаж тогтоох ёстой. Надад тухайн үеийн бичлэг, баримтууд бүгд байгаа. Үнэн мөн тогтоогдож, хохирлыг барагдуулах ёстой гэж би үзэж байна.