🔴 Ж.Алдаржавхлан: Энэ засгийн газар 2028 оны сонгууль хүртэл бүрэн бүтэн ажиллаасай

УИХ-ын гишүүн Ж.Алдаржавхлан шинээр байгуулагдаж буй Засгийн газрын тэргүүнийг бүрэн дүүрэн дэмжиж байгаагаа илэрхийллээ. Тэрбээр энэ удаагийн Засгийн газрыг 2028 он хүртэлх бүрэн эрхийн хугацаандаа тогтвортой ажиллах ёстой гэж үзэж байгаа бөгөөд Монгол Ардын намаас ард түмэндээ амласан мөрийн хөтөлбөр, олон чухал амлалтуудыг хэрэгжүүлж дуусгах нь нэн тэргүүний зорилт болохыг онцлов.

Мөн нийт хүн амын 50 хувь нь оршин сууж буй нийслэл хотын асуудалд шинэ Ерөнхий сайдыг онцгой анхаарч ажиллахыг хүслээ. Засгийн газар байгуулагдсаны дараа ажлын хэсэг байгуулж, нийслэлийн хэмжээнд хэрэгжиж буй төслүүдийг хянан үзэж, үр өгөөжтэй сайн төслүүдийг нь бодлогоор дэмжиж явуулах шаардлагатайг тэрбээр сануулсан юм.

Улс төрийн нөхцөл байдлын тухайд Ж.Алдаржавхлан гишүүн МАН-ын гишүүддээ хандан эв нэгдэлтэй байхыг уриаллаа. Сөрөг хүчний зүгээс Засгийн газрыг тогтворгүй болгох, огцруулах асуудлыг үе шаттайгаар хөндөж ирснийг дурдаад, эрх баригч намын гишүүд сөрөг хүчний улс төрийн тоглолтод хөтлөгдөхгүй байх нь чухал гэдгийг зориуд анхааруулав.

Тэрбээр сүүлд нь шинэ Засгийн газрын үйл ажиллагаа болон холбогдох хууль тогтоомжийг 100 хувь дэмжиж ажиллахаа илэрхийлсэн юм.