🔴 Д.Цогтбаатар: АТГ-ын даргыг огцруулдаг байх хуулийг би санаачилъя

УИХ-ын гишүүн Д.Цогтбаатар Ерөнхий сайдыг томилох асуудлыг хэлэлцэх үеэр төрийн өмчит компаниудын үргүй зардал, удирдлагуудын тансаглал болон хариуцлагын тогтолцооны талаар шүүмжлэлтэй байр суурь илэрхийллээ. Тэрээр ардчилсан нийгэмд төрж өссөн залуу боловсон хүчин Засгийн газрыг тэргүүлэх гэж байгааг дэмжиж буйгаа илэрхийлээд, бодит ажлууд дээр анхаарал хандуулахыг хүслээ.

Гишүүн Д.Цогтбаатар "Эрдэнэс Монгол" нэгдлийн үйл ажиллагааг онцлон шүүмжлэв. Тус компани нь яам эсвэл Засгийн газрын хэрэг эрхлэх газрын аль нь болох нь тодорхойгүй бүтэцтэй атлаа жилд 600-700 тэрбум төгрөг төвлөрүүлж, үр дүнгүй зарцуулж байгааг тэрээр хэллээ. Мөн иргэдийн мэдэх эрхийг хангаж, шүгэл үлээж буй иргэдийн дуу хоолойг дарга нар сонсохгүй, занадаг байдал нийгэмд газар авсныг анхааруулав.

Төрийн албаны халаа сэлгээ болон түүнээс үүдэлтэй төсвийн хохирлын талаар тэрээр баримт дурдлаа. Тухайлбал, улсын хэмжээнд ажлаас халагдсаны тэтгэмжид 2023 онд 21 тэрбум, 2024 онд 40 тэрбум төгрөгийг улсын төсвөөс гаргасан байна. Төрийн өмчит компаниудын удирдлагууд улсын хөрөнгөөр гэр бүлээ зөөж, тансаглаж байгааг шүүмжлээд, "Хэмнэе, гамная гэсэн бодолтой нэг ч дарга алга. Бүгдээрээ гудамжинд алхаж, автобусанд сууж чадахаа байсан" хэмээн бухимдлаа илэрхийлэв.

Видео хэлбэрээр үзэхийг хүсвэл ЭНД дарна уу

Цалин хөлсний асар их зөрүү байгааг тэрээр жишээгээр тайлбарлалаа. "Эрдэнэс Монгол" компанийн захирал асан жилийн 393 сая төгрөгийн цалин авч байсан бол одоогийн удирдлагууд нь цалингаа "хувь хүний нууц" хэмээн нууцалж байгааг шүүмжлэв. Багш, эмч нар болон ахмадууд цалин, тэтгэврээ нэмүүлэхээр жагсаж байхад төрийн өмчит компаниудын удирдлагууд ийм өндөр цалин авч, МИАТ зэрэг компаниуд үргүй зардал гаргаж байгааг зогсоож, хувьчлах шаардлагатайг хэллээ.

Авлигатай тэмцэх газрын (АТГ) үйл ажиллагаанд ч Д.Цогтбаатар гишүүн сэтгэл дундуур байгаагаа илэрхийлэв. Авлигын хэрэг 100 сая төгрөгөөр биш, 100 сая доллароор хэмжигддэг болсон байхад АТГ ажлаа хийхгүй, улс төрийн захиалгаар хүн намнадаг байж болохгүйг анхаарууллаа. Тэрээр АТГ-ын даргыг үүрэгт ажлаас нь чөлөөлөх боломжтой хуулийн төслийг яаралтай оруулж ирэхгүй бол өөрөө санаачлахаа мэдэгдэв.

Ерөнхий сайдад нэр дэвшигч Н.Учрал гишүүний асуултад хариулахдаа, "Эрдэнэс Монгол" нэгдэл нь Үндэсний баялгийн сангийн хуулийн дагуу алдагдалтай компаниудад менежмент хийх үүрэгтэйг тайлбарлалаа. Тэрээр цаашид KPI буюу гүйцэтгэлийн үзүүлэлтэд суурилсан гэрээ байгуулж, ашигтай ажилласан тохиолдолд урамшуулал авдаг зарчим руу шилжинэ гэв. Мөн Шилэн ажиллагааны хүрээнд төрийн өмчит компаниудын 68 нэр төрлийн мэдээлэл, тэр дундаа цалин хөлсний мэдээллийг ил тод байлгахыг шаардаж, эс үйлдэл гаргасан удирдлагуудад хариуцлага тооцохоо амлалаа.

Н.Учрал мөн төрийн албыг хэт улс төржүүлэх нь чадвартай залуусыг дайжуулах эрсдэлтэйг сануулж, хариуцлагатай ажиллаж байгаа албан хаагчдаа хамгаалах бодлого баримтлахаа илэрхийлэв. Тэрээр авлигын индексийг урагшлуулахын тулд хууль хяналтын байгууллагуудтай хамтарч, сахилга бат, хариуцлагыг чангатган ажиллахаа мэдэгдсэнээр хэлэлцүүлэг өндөрлөв.