🔴О.Номинчимэг: Төрийн өмчит компаниудын асуудал бол шударга ёс, эдийн засгийн зангилаа цэг юм

УИХ-ын чуулганы нэгдсэн хуралдааны үеэр УИХ-ын гишүүн О.Номинчимэг Засгийн газрын гишүүдийг томилох асуудалтай холбогдуулан байр сууриа илэрхийллээ. Тэрбээр иргэдийн хамгийн суурь хүлээлт болох эдийн засгийн хангалуун байдал, эрүүл аюулгүй орчин болон шударга нийгмийг цогцлооход төрийн өмчит компаниудын (ТӨК) засаглалыг сайжруулах асуудал нэн чухал болохыг онцлов.

О.Номинчимэг гишүүн хэлсэн үгэндээ, "Иргэд биднээс ердөө гуравхан зүйлийг хүсдэг. Нэгдүгээрт, эдийн засгийн хувьд хангалуун амьдрах, хоёрдугаарт, утаа түгжрэлгүй, эрүүл аюулгүй орчинд амьдрах, гуравдугаарт, хүний эрх, хуулийн засаглал үйлчилдэг шударга нийгэмд амьдрахыг хүсэж байна. Эдгээр гурван зүйлийн зангилаа нь төрийн болон орон нутгийн өмчит компаниудын асуудал юм" хэмээн тэмдэглэлээ.

Тэрбээр ТӨК-удын өнөөгийн нөхцөл байдлыг шүүмжлэхдээ, эдгээр байгууллагууд хувийн хэвшлийн орон зай руу хэт орж, чөлөөт өрсөлдөөнийг боомилж байгааг дурдсан юм. Мөн нийгэмд үүсээд байгаа авлига хээл хахууль, "цавчаа" зэрэг шударга бус байдлын үндэс суурь нь ТӨК-удын үйл ажиллагаа, намын санхүүжилт болон сонгуульд төрийн нөөц бололцоог ашигладаг байдалтай холбоотой гэж үзэж байгаагаа илэрхийлэв.

Видео хэлбэрээр үзэхийг хүсвэл ЭНД дарна уу

Үүний хариуд Н.Учрал гишүүн төрийн өмчит компаниудын эдийн засагт эзлэх оролцоо 61 хувьд хүрсэн нь хувийн хэвшил бие даан ажиллах боломжийг хязгаарлаж байгааг хүлээн зөвшөөрлөө. Тэрбээр "Энэ бол дуусдаггүй яриа болчихсон байна. Одоо энэ яриаг эцэслэх цаг болсон" гээд, ТӨК-ийн бүтээмж, засаглал, ил тод байдлыг сайжруулах болон Нийтийн өмчийн тухай хуулийн төслүүдийг УИХ-аар яаралтай батлах шаардлагатайг онцлов.

Хууль эрх зүйн шинэчлэл хийгдсэнээр ТӨК-удыг нэгтгэх, өөрчлөн байгуулах, татан буулгах эсвэл нээлттэй компани болгох замаар засаглалыг нь сайжруулах боломж бүрдэх юм. Гэвч олон улсын аудит оруулах, үнэлгээ хийлгэх зэрэгт дотоодын хууль тогтоомжийн зарим хязгаарлалт саад болж байгааг Н.Учрал гишүүн дурдаж, Эдийн засгийн эрх чөлөөний тухай хуулийг дагалдах 30 гаруй хуулийн шинэчлэлийг хамтдаа шийдвэрлэхийг уриаллаа.

Одоогоор УИХ-ын гишүүн О.Номинчимэг тус хуулийн төслийн ажлын хэсгийг ахалж байгаа бөгөөд хаврын чуулганаар хууль батлагдвал Засгийн газраас ТӨК-уудын талаар баримтлах үндсэн чиглэл, бүтцийн өөрчлөлтийн бодлогыг шуурхай оруулж ирэхэд бэлэн байгаагаа хэллээ.