🔴 Ж.Бат-Эрдэнэ: Шинэ Ерөнхий сайд ирэх лхагва гараг гэхэд Засгийн газрын бүрэлдэхүүнээ бэлэн болгох төлөвлөгөөтэй байгаа юм байна

Улсын Их Хурлын чуулганы нэгдсэн хуралдаанаар Ерөнхий сайдыг томилох асуудлыг хэлэлцэж байна. Хэлэлцүүлгийн явцад Ардчилсан намын бүлгээс завсарлага хүссэний дагуу хуралдааныг нэг цагийн хугацаатай завсарлуулаад байгаа бөгөөд энэ талаар УИХ-ын дэд дарга Ж.Бат-Эрдэнэ мэдээлэл өглөө.

Тэрбээр хэлэхдээ, улс орны эдийн засгийн нөхцөл байдал хүнд байгаа энэ үед Ерөнхий сайдад нэр дэвшигч ямар бодлого баримталж ажиллах нь нэн чухал байгааг онцлов. Тиймээс АН-ын бүлгийн зүгээс нэр дэвшигчийн мөрийн хөтөлбөр, эдийн засгийн хүндрэлийг давах төлөвлөгөөг бүлгийн хуралдаан дээрээ дэлгэрэнгүй сонсох зорилгоор нэг хоногийн завсарлага хүссэн болохыг тайлбарласан юм. Гэвч УИХ-ын даргын зүгээс асуудлын шуурхай байдлыг харгалзан нэг цагийн завсарлага өгсөн байна.

Ерөнхий сайдад нэр дэвшигчийн зүгээс ирэх лхагва гараг гэхэд Засгийн газрын бүрэлдэхүүнээ бэлэн болгож, төрийн ажлыг гацаахгүйгээр яаралтай үргэлжлүүлэх байр суурьтай байгаа аж. Төрийн хямралаас зайлсхийж, хүндрэлтэй нөхцөл байдалд Засгийн газар, УИХ-ыг шуурхай ажиллуулах боломжийг бүрдүүлэх нь чухал гэдгийг нэр дэвшигч илэрхийлсэн байна.

Одоогийн байдлаар чуулганы хуралдаанд үг хэлэхээр дарааллаа авсан 38 гишүүн байгаа бөгөөд хэлэлцүүлэг үргэлжлэх шатандаа байна. УИХ-ын дэд дарга Ж.Бат-Эрдэнэ гишүүдийн асуулт, хариулт дуусаагүй байгаа тул хэлэлцүүлэг нэлээд хугацаанд үргэлжлэх төлөвтэй байгааг дурдлаа.