🔴 Б.Батбаатар: Шинэ Ерөнхий сайдын зүгээс манай намд ямар нэгэн санал ирүүлээгүй байна

ИЗНН-ын дарга Б.Батбаатар цаг үеийн асуудлаар болон Засгийн газрын бүтэц, бүрэлдэхүүн, намын дотоод нөхцөл байдлын талаар мэдээлэл өглөө. Тэрээр Ерөнхий сайд өөрийн хүсэлтээр үүрэгт ажлаасаа чөлөөлөгдсөний дараа МАН-ын Удирдах зөвлөл болон Бага хурлаас дараагийн Ерөнхий сайдад Н.Учралыг нэр дэвшүүлсэн нь хуулийн дагуу процесс үргэлжилж байгааг онцлов.

Шинээр томилогдох Ерөнхий сайд эхний ээлжинд Засгийн газрын бүтэц, бүрэлдэхүүнээ өөрчлөх эсэхээ шийдэх байх гэж тэрээр үзэж байна. Үүний дараа улс төрийн намуудад хамтран ажиллах санал тавьсан тохиолдолд л ИЗНН-ын хувьд албан ёсны яриа хэлэлцээ хийх боломжтой болохыг дурдлаа. Одоогоор шинэ Ерөнхий сайдын зүгээс ямар нэгэн санал ирүүлээгүй байгаа тул урьдчилж байр суурь илэрхийлэх боломжгүй гэдгийг Б.Батбаатар дарга тодотгов.

Намын дотоод асуудал болон тамга тэмдгийн маргааны тухайд тэрээр хэлэхдээ, улс төрийн нам нь Үндсэн хууль болон Улс төрийн намын тухай хуулийн хүрээнд, өөрийн дүрмийн дагуу үйл ажиллагаа явуулах ёстойг санууллаа. Дүрмийн бус аливаа үйл ажиллагаа Монгол Улсад зөвшөөрөгдөхгүй бөгөөд өмнө нь гарч байсан МАХН-ын маргаантай ижил замаар энэ асуудал эцэслэгдэнэ гэж харж байгаагаа илэрхийлэв.

ИЗНН-ын Гүйцэтгэх төв байгууллага болон Төлөөллийн төв байгууллага хуралдаж, намын Их хурлыг ирэх дөрөвдүгээр сарын 26-ны өдөр товлон зарласан байна. Энэхүү хурлаар намын дүрмийн болон бүртгэлийн асуудлыг эцэслэн шийдвэрлэж, Улсын Дээд шүүхэд хандах аж. Одоогоор Дээд шүүхийн албан ёсны бүртгэл болон цахим хуудас дээр тус намын дүрэм, удирдлагын бүртгэл хэвээр байгааг тэрээр онцлон тэмдэглэлээ.

Засгийн газарт хамтран ажилласан хугацааны үр дүнгийн талаар Б.Батбаатар хэлэхдээ, байгаль орчны салбарт нэлээдгүй олон ажил хэрэгжиж, тус салбар өөрийн байр сууриа эргүүлэн олж авах процесс амжилттай үргэлжилж байгааг дурдлаа. Мөн тэрээр Туулын хурдны замын төсөл болон төрийн байгуулалтын асуудлаар АН-ын бүлгийн хуралдаанд оролцож, байр сууриа солилцсон байна.