🔴 Г.Дамдинням: Сайдын албыг хаших хугацаандаа эхлүүлсэн болон үргэлжлүүлж буй стратегийн ач холбогдолтой ажлуудаа дуусгах эрмэлзэлтэй байна

Аж үйлдвэр, эрдэс баялгийн сайд Г.Дамдинням салбарын хэмжээнд хэрэгжүүлж буй томоохон төсөл, хөтөлбөрүүд болон Оюу толгойн хэлэлцээрийн явцын талаар мэдээлэл өглөө. Тэрээр сайдын албыг хаших хугацаандаа эхлүүлсэн болон үргэлжлүүлж буй стратегийн ач холбогдолтой ажлуудаа дуусгах эрмэлзэлтэй байгаагаа илэрхийлэв.

Нэн тэргүүнд, Монгол Улсыг газрын тосны бүтээгдэхүүнээр тасралтгүй хангах тухай болон агаарын хөлгийн түлшний хэлэлцээрийг УИХ-д өргөн бариад байна. Уг хэлэлцээр хүчин төгөлдөр болсноор шатахуун, түлшний нийлүүлэлт тогтворжих бөгөөд Төсвийн байнгын хороо, Эдийн засгийн байнгын хороо болон Аюулгүй байдал, гадаад бодлогын байнгын хороогоор хэлэлцүүлэн зөвшөөрөл авсны дараа ОХУ-д очиж гарын үсэг зурах шатандаа байгааг онцоллоо.

Мөн улсын хэмжээнд газрын тосны бүтээгдэхүүний нөөцийг нэмэгдүүлэх чиглэлээр энэ ондоо багтаан 150 мянган м3-ийн хүчин чадалтай агуулахыг ашиглалтад оруулахаар ажиллаж байна. Ирэх жилүүдэд хадгалах савны багтаамжийг үе шаттайгаар нэмэгдүүлснээр улсын хэмжээнд 1-4 сарын хэрэглээний нөөцөө бие даан бүрдүүлэх боломж бүрдэх юм.

Салбарын эрх зүйн шинэчлэлийн хүрээнд Ашигт малтмалын тухай хуулийн төсөл бэлэн болж, яамдаас санал авах ажил дуусжээ. Уг хуулиар хариуцлагатай уул уурхайг дэмжих, АМНАТ-ын тодорхой хувийг орон нутагт нь түлхүү хуваарилах, зэсийн салбарыг эдийн засгийн хоёр дахь том тулгуур болгон хөгжүүлэх зэрэг суурь өөрчлөлтүүдийг тусгасан байна. Үүний зэрэгцээ ган, алт хайлуулах, хөнгөн цагаан болон зэс хайлуулах үйлдвэр гэсэн хүнд үйлдвэрийн дөрвөн том төслийг гараанаас гаргахад бэлэн болгожээ.

Оюу толгойн хэлэлцээрийн тухайд Г.Дамдинням сайд менежментийн төлбөрийг хариуцсан ажлын хэсгийг ахлан ажиллаж байгаа бөгөөд Засгийн газраас өгсөн үүрэг даалгаврын биелэлт тун ойрхон байгааг дурдлаа. Хэлэлцээрийн явцад Рио Тинто талтай зөвшилцөж, долоон жилийн "түгжээг" гаргах болон хэлэлцээрийг үр дүнд хүртэл үргэлжлүүлэх тохиролцоонд хүрсэн нь томоохон ахиц болсныг тэрээр тэмдэглэв.

УИХ-ын 120 дугаар тогтоолын дагуу Оюу толгойн төсөлтэй холбоотой нарийн тактикийн асуудлууд нууцын зэрэглэлтэй хэлэлцэгдэж байгаа тул дэлгэрэнгүй мэдээлэл өгөх боломжгүй ч хэлэлцээр амжилттай үргэлжилж байгааг сайд онцлон хэллээ.