🔴 Я.Содбаатар: Н.Учралыг Ерөнхий сайд болгохыг МАН дэмжсэн тул одоо парламент шийднэ

МАН-ын Бага хурлын III хуралдаан амжилттай болж өндөрлөлөө. Тус хуралдаанаар Монгол Улсын Ерөнхий сайдад нэр дэвшүүлэх тухай болон УИХ дахь МАН-ын бүлэг, намын Удирдах зөвлөлд чиглэл өгөх тухай гэсэн үндсэн хоёр асуудлыг хэлэлцэж, холбогдох тогтоолуудыг баталлаа.

Бага хурлын III хуралдаанаас Монгол Улсын Ерөнхий сайдад Ням-Осорын Учралыг нэр дэвшүүлэх нь зүйтэй гэж үзэн, Бага хурлын гишүүдийн 99.7 хувийн саналаар дэмжлээ. Намын Бага хурлын шийдвэр гарсантай холбогдуулан Ерөнхий сайдыг томилох үйл явц цаашид Монгол Улсын Үндсэн хууль болон бусад хууль тогтоомжийн дагуу шийдэгдэх болно.

Мөн хуралдаанаар Ойрх Дорнодод үүсээд байгаа нөхцөл байдлаас үүдэлтэй дэлхий нийтийг хамарсан эдийн засгийн хямралыг хохирол багатай даван туулах асуудлыг хэлэлцлээ. Энэ хүрээнд УИХ дахь МАН-ын бүлэг болон төрийн байгууллагуудад хүндрэлийг даван туулах цогц хөтөлбөр, төлөвлөгөө гаргаж ажиллах чиглэлийг өгсөн байна.

УИХ дахь МАН-ын бүлгийн гишүүдэд намын дотоод эв нэгдлийг сахиж, үндэсний язгуур эрх ашгийг дээдлэн, Засгийн газрыг тогтвортой ажиллуулахыг үүрэг болголоо. Намын даргын тэргүүлэх Засгийн газрын бодлого, үйл ажиллагааг нэгдсэн байдлаар тууштай дэмжиж ажиллах чиглэл бүхий тогтоолыг баталлаа.

МАН авлига, хээл хахууль болон улс орны язгуур эрх ашгийн эсрэг аливаа зүйлтэй хэзээ ч эвлэрэхгүй гэдгээ дахин нотоллоо. Энэхүү байр суурь нь намын 31 дүгээр Их хурлаар тодорхойлогдсон бөгөөд намын бүх шатны байгууллага, Удирдах зөвлөл энэ чиглэлд идэвхтэй ажиллахаа илэрхийлэв.

Хуралдааны явцад Бага хурлын гишүүд нийгэм, эдийн засгийн нөхцөл байдал болон иргэдээс ирүүлж буй саналуудын талаар нээлттэй, шүүмжлэлтэй байр сууринаас хандаж, санал бодлоо илэрхийллээ. Ерөнхий сайдад нэр дэвшигчийн хувьд дэлхий нийтэд үүсээд байгаа эдийн засгийн хямралыг даван туулахын тулд цаг алдалгүй Засгийн газраа бүрдүүлж ажиллахаа мэдэгдсэн.

Засгийн газрын гишүүдийг томилох асуудал одоогоор яригдаагүй бөгөөд энэ нь хууль ёсны дагуу намын Удирдах зөвлөл болон бүлгийн хурлаар хэлэлцэгддэг журамтай. Шинэ Ерөнхий сайд УИХ-аар батлагдсаны дараа өөрийн бүрэн эрхийн хүрээнд Засгийн газрын бүрэлдэхүүний талаарх саналаа танилцуулна

Хуралдааны үеэр зарим гишүүд бусад улс төрийн хүчинтэй эвсэхгүй байх байр сууриа илэрхийлсэн. Мөн Ерөнхий сайд асан Г.Занданшатар өөрийн үйл ажиллагааны талаар мэдээлэл хийсэн бөгөөд энэ удаагийн Засгийн газар огцорч байгаа нь алдаа дутагдал гаргасандаа бус, харин төрийн үйл ажиллагааг гацаанаас гаргах, улс төрийн соёл гаргаж буй үйл явц гэдгийг онцоллоо.

Намын гишүүдийн сахилга бат, хариуцлагын асуудлыг МАН-ын дэргэдэх Хяналтын ерөнхий хороо хариуцан ажилладаг. Цаашид намын дүрэмд заасан механизмын дагуу гишүүдийн хариуцлагыг өндөржүүлж, сахилга батыг чанд сахиулах чиглэлээр ажиллахаа мэдэгдсэнээр Бага хурлын III хуралдаан өндөрлөлөө.