🔴Г.Лувсанжамц: Сонгуульд ялж, засаг барьж байгаа намын дарга нь Ерөнхий сайд байх ёстой гэсэн зарчмыг би тууштай баримталдаг

УИХ-ын гишүүн, МАН-ын Бага хурлын гишүүн Г.Лувсанжамц намын Бага хурлын үеэр засаглалын тогтвортой байдал болон эдийн засгийн тулгамдсан асуудлаар байр сууриа илэрхийллээ. Тэрбээр УИХ-ын дарга болон Ерөнхий сайдад нэр дэвшүүлэх асуудлыг хэлэлцэж буй энэ үед намын эв нэгдэл, бодлогын залгамж халаа хамгийн чухал байгааг онцлов.

Г.Лувсанжамц гишүүн хэлэхдээ, өнгөрсөн хугацаанд эрх баригч намын дотоод хагарлаас үүдэж Засгийн газар тогтворгүй байсан гашуун туршлага байгааг дурдаад, энэ удаагийн хурлаар намын эв нэгдлийг хангаж, чадвартай Засгийн газрыг бүрдүүлэх ёстой гэсэн юм. Тэрбээр "Сонгуульд ялж, засаг барьж байгаа намын дарга нь Ерөнхий сайд байх ёстой гэсэн зарчмыг би тууштай баримталдаг. Энэ тогтолцоо алдагдсанаас болж улс төрийн тогтворгүй байдал үүсдэг" хэмээн тайлбарлалаа.

Мөн тэрбээр өнгөрсөн хоёрдугаар сарын 27-нд болсон намын Бага хурлын зорилгыг тодотгов. Тухайн үед МАН-ын дэргэдэх бодлогын 11 хорооны хүрээнд салбар бүрийн зохицуулалт, нийгэм, эдийн засгийн нөхцөл байдлыг сайжруулах мэргэжлийн шийдлүүдийг хэлэлцсэн бөгөөд намын 105 жилийн ойн агуулгатай байсныг тэмдэглэсэн юм.

Эдийн засгийн нөхцөл байдлын тухайд, дэлхий нийтэд шатахууны үнээс үүдэлтэй хүндрэлүүд үүсэж байгааг тэрбээр анхаарууллаа. Олон улсын хандлагаар нефтийн үнэ 2029 он хүртэл тогтворжихгүй байх магадлалтай байгаа тул Монгол Улс 2026 он хүртэлх бэлтгэлээ одооноос базааж, төсвийн тодотгол болон бусад шаардлагатай арга хэмжээг яаралтай авах хэрэгтэйг сануулав.

Одоогийн байдлаар улсын хэмжээнд шатахууны 30-аас 45 хоногийн нөөц байгаа ч хаврын тариалалт, намрын ургац хураалт болон төсвийн орлогыг бүрдүүлдэг уул уурхайн салбарын хэвийн үйл ажиллагааг хангахын тулд түлш, шатахууны тасалдалгүй байдалд онцгой анхаарах шаардлагатайг Г.Лувсанжамц гишүүн хэлсэн үгэндээ онцоллоо.