🔴Н.Учрал: "Ардын нам ард түмэн та бүхэндээ эргэн ирлээ" хэмээн би МАН-ын даргад нэр дэвшиж байна

МАН-ын ээлжит 31 дүгээр их хурал үргэлжилж байна. 

Хуралдааны эхэнд МАН-ын дарга Л.Оюун-Эрдэнэ, МАН-ын Бага хурлаас сонгогдсон шинэ дарга Д.Амарбаясгалан нарын илтгэлийг сонссон. Мөн хэлэлцэх асуудлын дарааллын дагуу тайлан, илтгэл /Уламжлал, шинэлчлэл, хөгжилд хөтөлсөн МАН/, Хяналтын Ерөнхий хорооны тайлан, илтгэлийг сонссон.

МАН-ын дарга сонгох 13 дахь даргыг сонгох сонгууль албан ёсоор эхэллээ.  МАН-ын ЕНБД Я.Содбаатар МАН-ын даргад Н.Учралыг дэвшүүллээ. Харин заалнаас Урбанек ХХК-ийн захирал Б.Лхагважав, УИХ-ын гишүүн Д.Энхтүвшин нар нэр дэвшлээ.

Эхлээд нэр дэвшигч Н.Учрал илтгэлээ танилцууллаа. Товчдоо, анхан, дунд шатанд ажиллаагүй бол бүх шатны сонгуульд оролцуулахгүй байх шударга зарчмыг баримтална. Намын гишүүдэд амжилтыг нь үнэлдэг үнэлгээний систем бий болгоно. Мөн авлига, албан тушаалын хэрэгт холбогдсон намын гишүүдэд улс төрийн дэмжлэг үзүүлэхгүй. УИХ-ын сонгуульд намын жагсаалт болон тойргоос нэр дэвшигчдийг бодлогын мэтгэлцээнээр шалгаруулна гэлээ.

Мөн Тусгаар тогтнолын ордныг хаалттай биш намын гишүүдийн мэтгэлцээний төв болгоно. Төрөөс өгдөг намын санхүүжилтийг төв нам дээр татаж аваад байх биш ажил хийж байгаа намын анхан болон дунд шатны байгууллагуудад хуваан өгнө. Жендерийн тэгш эрхийг бүрэн хангана. Төрийн өмчийн компаниуд л дотроосоо хулгай, цавчаа хийж байгаа тул дахиж төрийн өмчийн нэг ч компани байгуулахгүй гэлээ. 

Эцэст нь, Ардын нам амьдралаас алсран тасарч, намын гишүүдээ огоорч, эргэх холбоогүй атлаа элдэв хоосон амлалт, хийрхлээр түмнээ тэтгэхгүй. Ардын нам эдийн засгийн өсөлтийг өрх бүрд авчирч бүтээснээсээ ихийг бүтээж, хүн арддаа эрх чөлөөг бүрэн, дүүрэн эдлүүлэх хариуцлагатай улс төрийн хүчин гэдгээ ахин баталж эргэн ирэх болно. Ардын нам ардынхаа зүрхэнд эргэн ирнэ. Ардын нам мянга мянган гишүүд та бүхнийхээ итгэл дэмжлэг дор дахин сэрнэ гэлээ.

Түүний дараа мөн намын даргад нэр дэвшигч Б.Лхагважав үг хэлэв.

Тэрбээр, Хэдхэн хоногийн өмнө Ерөнхий сайд байсан, МАН-ны дарга байсан, УИХ-ын дарга байсан залуусаа бид хөөн явууллаа. Н.Энхбаяр, С.Баяр дарга нарт ч ийм хүндрэл тулгарч байсан. Тэд бүгд шоронд орсон. Энэ бол манай улсын тогтолцоонд тулгарч байгаа хүндрэл юм. Газрын хэвлийн баялагт очихын тулд Үндсэн хууль, төрийн систем зэрэг янз бүрийн механизм ашиглаад шийдвэр гаргасан бүх улс төрчдийг шоронд явуулж байна. Энийг бид бодох ёстой. МАН-ын 30 дугаар их хурал дээр Л.Оюун-Эрдэнэ сайдыг намын дарга болж байхад би мөн хэлж байсан. Төрийн өмч дээр шийдвэр гаргасан улс төрч бүр шоронгийн хадаас болж байна. Энэ бол монголчууд маань газрын хэвлийн баялгаасаа болж яваандаа дэлхийн хөрснөөс арчигдах зам руу орох гэж байна. Шийдвэр гаргаж байгаа хүмүүсээ хамгаалах хэрэгтэй байна. Төрийн ниймщтийн хамааралтай өмчийн асуудал дээр шийдвэр гаргадаг прокурортой болох ёстой, цэцтэй болох ёстой.

Ийм байдалд оруулж, шийдвэр гаргаж байгаа хүмүүсээс МАН болгоомжлох хэрэгтэй байна. Шийдэх ёстой бөглөөс болсоор 30 жил өнгөрлөө. МАН өөрөө цэвэрших ёстой болжээ. 

Эцэст нь хэлэхэд олонхийн санал авч Н.Учрал намын дарга болох юм шиг байна. Н.Учралдаа амжилт хүсье. Гэхдээ 100 гаруй жилийн түүхтэй нам ганцхан нэр дэвшигч гаргаад, баталчихаж болохгүй байх. Ардчилалтай нам болохын хувьд сайхан шударгаар өрсөлдье. Намайг дэмжээрэй, гишүүд ээ гэлээ.