🔴НЭР ДЭВШИГЧИД: Нийслэл хотод Ардчилсан нам яагаад үргэлж ялагддаг болов?

Маргааш /2025.08.31/ Ардчилсан намын ҮБХ хуралдаж, намын шинэ даргаа тодруулна.

Намын даргын сунгаатай холбогдуулж NTV телевизээр нэр дэвшигчид мэтгэлцэж байна. “Эрх чөлөө-Эргэлтийн цаг” мэтгэлцээнд оролцож буй оролцогчдоос "Нийслэл хотод АН гурав дараалан ялагдлаа. Ялагдах бүрт тоо нь буурч байна. НИТХ-д АН 5 суудалтай болжээ. Намын дарга болвол нийслэлд ялалт авчрахын тулд ямар бодлогын дэмжлэг үзүүлэх вэ?" гэх асуултыг хөтлөгч асуусан юм.

Нэр дэвшигч Ж.Баярмаа: Арга байхгүй, АН нийслэл дэхь дэмжигчдийнхээ итгэлийг алдсан. Аливаа бодлогын шийдлийг гаргахдаа үндсэн үзэл баримтлалаа гээж, хатуу тууштай зогсоогүйн улмаас итгэл алдсан. Нийслэлийг хэрхэн хөгжүүлэх вэ гэдэг нь тусдаа концепц. Сонгогчдодоо бүрэн ойлгуулж чадаагүй байх. Хоёрдугаарт, ний нуугүй хэлэхэд манай төрийн бүтэц онцгүй байна. Бүх тойрогт эрх баригч нам төрийн албыг ашиглаад бүтцээ угсарчихсан. Халамжтай холбоотой. Амьдрал хэцүү дүүргүүдэд нийгмийн халамжийг хавтгай тарааж байгаа учраас нийслэлийн иргэд зүүн төвтэй намыг сонгоод байна. Бид төрийн албаа эргэж харах хэрэгтэй. Жишээ нь хэсгийн ахлагчийн үүрэг функц сонгуульд зориулагдсан байгааг халах хэрэгтэй.

Нэр дэвшигч Б.Пүрэвдорж: Өнгөрсөн парламентийн 8 жилд нь самбар тавьж байгаад эрх баригчдын алдааг шүүмжилдэг байсан.  Улаанбаатар хотод МАН 35 жилийн 31 жилд нь засагласан. Түгжрэл тухайн үеийн МАН-ын дарга нарын төлөвлөлтгүй газар зарсантай холбоотой. Утаа ядуурлын үр дүн. Төсвөөр дамжуулж ард иргэдийн бүх боломжийг авсан улс шүү дээ. Ядуу байгаа иргэд орон сууцанд орж чадахгүй, асуудлаа шийдэж чадахгүй байна. Өнөөдөр НИТХ бол орон нутгийн парламент гэсэн үг. Засаг даргын үйл ажиллагаанд хяналт тавих ёстой байтал НИТХ-ын төлөөлөгчийн 80 хувь нь засаг даргынхаа дор орж ажиллаж байгаа учраас хяналт байхгүй болчихжээ. Засаг даргыг ард иргэдээс нь сонгох шаардлагатай болжээ. 

Монголчууд ардчилсан тогтолцоог зөв гэж үздэг гэсэн судалгаа байсан. Гэхдээ тэдний хэмжээний хүн амьдралдаа сэтгэл хангалуун бус байдаг гэсэн судалгаа бий. Гэтэл яагаад АН ялагдаад байна вэ гэвэл ард түмний 30 хувь нь ядууралд өртсөн, мөн 30 хувь нь ядуурлын шугамд ойр байгаагаас шалтгаалж байна. Тиймээс маш том бодлогын өөрчлөлтүүдэд зориг гарган зогсох ёстой. Халамжаар ядуурал буурдаггүй. Хөдөлмөрөөр буурах ёстой. Үүнийг АН хийж чадна. Чөтгөрийн тойргийг өөрчилнө.

Нэр дэвшигч Б.Отгонбат: Нийслэл хотод хоёр том асуудал байна. Нэгдүгээрт, Утаа. Яаж алга болгох вэ гэхээр цэвэр иргэдийн орлоготой холбоотой. Хэн ч гэрт амьдарч, утаанд хордохыг хүсэхгүй. АН орон сууцтай болгох бодлого гаргах ёстой. Хоёрдугаарт, Түгжрэл. 

Нэр дэвшигч О.Цогтгэрэл: Яагаад нийслэлд АН ялагддаг болчихов гэвэл нийслэлд байгаа залуус, бизнесийн салбарт ардчиллын үнэт зүйл, үзэл баримтлалаа мөрдөж чадаагүйн улмаас итгэлийг нь алдсан. Хэн нэгний буруу биш АН-ын буруу. Нөгөө талаас өнгөрсөн хугацаанд үнэмлэхүй ялсан МАН-ын засаглалын үр дүнд юу болов. Тэд хангалттай эрх мэдэл, улсын төсөвтэй ижил төсөв тавиулж чадаж байна. Үндсэн шалтгаан нь хандлага дутаж байгаа хэрэг шүү дээ. УИХ дээр хяналт шалгалтын сонсгол хийж ярих ёстой гэж боддог.