🔴 О.Цогтгэрэл, Б.Пүрэвдорж "Хамтарсан Засгийн газарт орно", Ж.Баярмаа, Г.Отгонбат "Яагаад ч орохгүй"...

Маргааш /2025.08.31/ Ардчилсан намын ҮБХ хуралдаж, намын шинэ даргаа тодруулна.

Намын даргын сунгаатай холбогдуулж NTV телевизээр нэр дэвшигчид мэтгэлцэж байна. “Эрх чөлөө-Эргэлтийн цаг” мэтгэлцээнд оролцож буй оролцогчдоос "Засаг барьж буй МАН-аас 2028 он хүртэл гүйцэтгэх засаглалд нэгдэн ажиллаач гэсэн санал дахин ирвэл Та намын даргын хувьд ямар байр суурь баримтлах вэ" гэх асуултыг хөтлөгч асуусан юм.

Нэр дэвшигч О.Цогтгэрэл: Надтай хамааралтай асуудал байна. Анхнаас нь Үндсэн хуулиараа олонхи нь олонхоо хийж, цөөнх нь цөөнхөө хийх ёстой гэх байр суурийг байнга илэрхийлж ирсэн. АН-ын ҮБХ-оос шийдвэр гарч хамтарч явсан. Шинээр санал ирвэл хувь хүний байр суурь тусдаа. ҮБХ буюу төлөөллийн төв байгууллага шийдвэрээ гаргавал дагана. МАН "Бид дангаараа төр барьж чадахгүй, засаглаж чадахгүй боллоо, улс орны эрх ашгийн төлөө хамтраач" гэдгээ албан ёсоор зарлаж, санал хүргүүлбэл энэ асуудлыг ярилцана. Хамтарна гэдэг нь айлын халаасанд орохын нэр биш гэж би боддог. 

Нэр дэвшигч Б.Отгонбат: Би О.Цогтгэрэл гишүүнтэй санал нийлэхгүй байна. Өнгөрсөн хугацаанд зөндөө хамтарсан ч сонгуульд дэвшүүлсэн мөрийн хөтөлбөрөө ч хэрэгжүүлж чадаагүй. Улс төрийн нам сонгуульд өөрийн мөрийн хөтөлбөрөө дэвшүүлж, түүнийгээ хэрэгжүүлж, ард түмнийхээ амьдралыг сайжруулах зорилгоор л ордог. Эвсээд орчихоор дуу хоолой байхгүй болчихдог. Сөрөг хүчин эрх баригч намын алдаатай бодлогыг хянадаг хяналтыг тогтолцоо шүү дээ. Гэтэл хөнжилдөө хамт орчихоор энэ хяналт байхгүй болчихож байгаа юм. Хамтдаа улс орноо хөгжүүлнэ гээд байдаг. Улс төрийн нам байгаад өрсөлдөж яах юм бэ. Хэн нь илүү чадвартай, бодлого боловсруулж байгааг ард түмэн сонгодог. Манай намынхан яг энэ зүйл дээр алдаад байгаа шүү. Би бол хамтарсан засагт орохгүй байх нь зөв гэж боддог. Ард түмний итгэлийг авах хүртлээ АН ажиллах ёстой. 1996 оноос АН засаг барьж чадсангүй. Монгол улс хагас социалист тогтолцоогоор 36 жил явчихлаа. Би эсрэг байр суурьтай байна. 

Нэр дэвшигч Б.Пүрэвдорж: Өнгөрсөн парламент Үндсэн хуулийн өөрчлөлт хийж, гишүүдийн тоог 126 болгосон. Сонгуулийн тогтолцоог пропорционал болгосон нь сонгогч бүрийн саналыг гээхгүй байх зарчим дээр суурилсан өөрчлөлт. Саяны сонгуулийн үр дүнд хамтарсан засаг байгуулагдсан ч нэг намын даргын хүмүүжилгүй хүүхдээс болж нөгөө намаа хөөсөн. Өнгөрсөн сонгуулиар 550 000 саналыг МАН-д өгсөн. Нийт сонгогчийн 3-ны нэг л гэсэн үг. Гэтэл АН-д 480 000 санал өгсөн. Өөрөөр хэлбэл ард түмэн 55/45 гэсэн харьцаатай санал өгсөн. Хэрэв хамтарсан засгийн газарт орж ажиллавал яг энэ 55/45 гэсэн харьцааг баримтлана. Урдынх шиг наймхан сайд ажил авч ажиллахгүй. Хамтарсан шиг хамтарч Засгийн газар, агентлагуудын 45 хувийн томилогоог авна. Доошоо аймаг, сум, багийн томилгоо, төрийн өмчийн томилгооны ч 45 хувийг авна. Хариуцлага дээр суурилсан харилцан тэнцэл, хяналтыг бий болгох замаар хамтарна. 

Нэр дэвшигч Ж.Баярмаа: Төөрөлдсөн асуудал энд байна. Үндсэн хуульд оруулсан өөрчлөлтөөр холимог тогтолцоог авсан. Энэ нь холилдож засаглана гэсэн үг биш. Манай эрх баригч намын багагүй тооны гишүүд энэ өнцгөөс тайлбарлаж, өөрсдийн хатавчинд байлгахыг санаархсан. АН ялагдсан учраас бодлого алдагдсан. Энэ хоёр нам нэг чиг шугам, үзэл баримтлалтай байсан бол хамтарч болно. Гэтэл МАН зүүн, АН баруун төвийн үзэл баримтлалтай учраас энэ хамтрал нурсан гэж би боддог. Реформын шинжтэй асуудал дээр АН-ын аль шинж чанартай мөрийн хөтөлбөрийг авч хэрэгжүүлэх юм, авлигыг устгах чиглэлээр ийм ийм бодлого авч хэрэгжүүлнэ гэх мэтээр бодлого дээрээ эвсэх асуудлаа эхнээс нь ярьсан бол удаан хугацаанд хамтарч чадах байсан. Толгой эргүүлсэн 14 мега төсөл гэж яриад нурсан. Харамсалтай нь манай тохиолдол арай өөр байна.