🔴 АН-ын даргад нэр дэвшигчид өөрсдийн давуу тал, бусдынхаа сул талыг "ярив"

Маргааш /2025.08.31/ Ардчилсан намын ҮБХ хуралдаж, намын шинэ даргаа тодруулна.

Намын даргын сунгаатай холбогдуулж NTV телевизээр нэр дэвшигчид мэтгэлцэж байна. “Эрх чөлөө-Эргэлтийн цаг” мэтгэлцээнд оролцож буй оролцогчдоос "Таны давуу тал ба өрсөлдөгчдийн сул тал" гэсэн асуултыг хөтлөгч асуусан юм.

Нэр дэвшигч О.Цогтгэрэл: Миний давуу болон сул тал гэхээс илүү АН-д ямар удирдлага, бодлого чиглэл хэрэгтэй вэ гэж ярих ёстой. Цаг үеийн ямар захиалга байна вэ гэдэг нь чухал. АН-ын улс төрийн систем болж хөгжиж чадсангүй хөгжиж ирлээ. Дайн тулаанаар бол олон баатартай ч инситутийг гаргадаг жанжид байхгүй. Өөрөөр хэлбэл зааварлан чиглүүлэгчгүй, стратегийн манлайлагчгүй явж ирсэн. Би хувийн хэвшилд насаараа ажиллаж ирсэн хүн. Мянга гаруй ажилтантай компанийг удирдаж, систем босгож үзсэн туршлагатай гэж өөрийгөө дүгнэнэ. Системийг би бүтээж чадна. Надад АН ялж үзээгүй тойрогт ялалт байгуулж байсан улс төрийн туршлага бий. Энэ хоёр нийлбэл АН-д хэрэгтэй гэж үзэж байна. 

Нэр дэвшигч Б.Отгонбат: Би Пенсильваны их сургуульд докторын зэрэг хамгаалсан судлаач, эрдэмтэн хүн. Аливаа зүйлд хандахдаа судалгаа дата-нд суурилж шийдвэр гаргана. Манай намын дутуу тал нь толгойдоо орсныг ярих гээд байдаг. Дэлхий хаашаа явж байна, хоёр хөрш ямар байр суурьтай байна, бид ямар зах зээл рүү ямар бүтээгдэхүүн гаргах юм, уул уурхайн бус ямар салбарыг хөгжүүлэх юм гэх мэт хийх зүйл их байгааг судалгаан дээр суурилж АН-ын бодлого руу оруулна. Би Глобал удирдагч, Шинэ зуун олон улсын сургуулийг үүсгэн байгуулсан, боловсролын салбарт хүч үзэж байгаа хүний хувьд боловсролын реформ хийнэ. АН-д шинэ боловсон хүчнийг ихээр оруулж ирнэ. Миний хамгийн том давуу тал бол дэлхийтэй харьцах байж магадгүй. Гадны хөрөнгө оруулагчид манай улсаас дүрвэж, итгэлгүй болсон. Би дэлхийд очиж мөнгө босгож чадна. Мэдлэг авчирна. 30 гаруй жил популизм хийлээ, одоо болъё. Үр дүн гаргадаг, ард түмний амьдралыг сайжруулдаг дарга АН-д хэрэгтэй. Бүх нэр дэвшигчид давуу тал бий. Нийлж ажиллах ёстой. 

Нэр дэвшигч Б.Пүрэвдорж: Улс төрийн намын хамгийн чухал зүйл бол төрийн бүх шатны сонгуульд оролцох асуудал. 1992 онд оюутан байхдаа сумандаа ухуулагчаар ажиллаж эхэлснээс хойш бүх сонгуульд ажилласан туршлагатай. Хоёрдугаарт, намын анхан болон дунд шатанд ажиллаж үзсэн. 2009-2012 онд Ховд аймагт ардчиллыг ухуулж, анх удаа ялуулж үзсэн. Гуравдугаарт, улс төрийн туршлага бий. 2016, 2020, 2024 оны сонгуулиудад дараалан ялалт байгуулж, хэт их ялж буй МАН-тай тулж ажилласан. Дээрээс нь би хөдөлмөрлөдөг. 330 сумаас би 165 суманд ажилласан. Хэн ч намайг ингэ гээгүй ч би өнцөг булан бүрт байгаа иргэдийн саналыг хуулинд тусгахын төлөө ажилласан. 8 хууль, 3 тогтоолын төслийг санаачлан ажилласан улс төрийн туршлага бий. Энэ бүх туршлагаа АН-ын үйл ажиллагаанд зориулна.

Нэр дэвшигч Ж.Баярмаа: Бидэнд бүгдэд нь давуу ба сул тал бий. Энэ бүгд нийлж байж АН-ыг ялалтад хүргэнэ. Манлайлж авч явж ялалтад хүргэх зорилго бүгдэд бий. Улс төрийн лидер хэн байгааг л харах ёстой. Бодлогыг өөрсдөө зохиохгүй судалгаанд үндэслэдэг учраас намын дэргэд "Бодлого судалгааны хүрээлэн" байгуулах ёстой. Удирдагчид алсын хараа байх ёстой. Энэ надад бий гэж бодож байна. Үзэл санаандаа үнэнч байх ёстой. Энэ бас надад байгаа гэж бодож байна. Кнопыг намын үзэл баримтлал, итгэл үнэмшлийн дагуу дарж байна уу үгүй юу гэдгийг харж удирдагчийг үнэлэх ёстой. Эцэст нь удирдагч хүнд зориг байх ёстой. Зоригтойгоор манлайлах, асуудлаас үл айж, няцашгүй цуцашгүй байх нь мөн л удирдагч хүнд байх чанар. Энэ бас надад байна гэж би харж байна.