Монголын мөсөнд авирагчид Кировд бэлтгэлээ базаасаар

Монголын Уулчдын Үндэсний Холбооны болон “Сутайн бор” клубын тамирчид ОХУ-ын Киров хотын мөсөнд авиралтын баазад хамтарсан бэлтгэлээ базааж буй. Тус бааз нь ДАШТ хүлээн авдаг байгууламж юм. Энэ удаагийн сургалт, бэлтгэл нь Мөсөнд авиралтын хосолсон/combined буюу хурд болон техникийн нийлбэр дүнгээр байр эзлэх/ төрлөөр анх удаа зохиогдох ДАШТ-ий өмнө болж байгаагаараа онцлог юм. ДАШТ Москва хотод энэ сарын 14-нд гараагаа эхлэх нь.

Киров хотын бэлтгэлийн баазад ОХУ, Финланд, Польш, Иран, Монгол улсын тамирчид бэлтгэл хийж байна. Манай тамирчид тив, дэлхийн шилдэг тамирчдаас олон зүйл сурч, туршлага солилцсоор. ОХУ-ын Мөсөнд авиралтын шигшээ багийн ерөнхий дасгалжуулагч П.Э.Шабалин манай тамирчдыг халуун дотно хүлээн авчээ.

ОХУ-ын шигшээ багийн нэрт тамирчин, дэлхийн аварга, дэлхийн цомын аварга шалгаруулах тэмцээний олон удаагийн аварга Екатерина Кощеева болон Екатерина Феоктистова нар биечлэн бэлтгэл, сургуулилтыг удирдаж буй гэнэ. Тэд  сүүлийн жилүүдэд ийн хамт бэлтгэл хийхийн зэрэгцээ дэлхийн аваргын болон дэлхийн цомын аварга шалгаруулах цуврал тэмцээнүүдэд хамт оролцдог болжээ. МУҮХ тэдэнд зориулж бяцхан сюрприз барьжээ. Хурд болон техникийн бэлтгэл өглөө 9-15 цагийн  хугацаанд үргэлжилдэг тул хэрэгтэй зарим багаж хэрэгсэл нэмж авсан аж.