"Буян холдинг" компани 1997 онд хуучнаар "Хангай" зочид буудлыг хувьчилж авсан байдаг. Түүнээс хойш энэхүү хотын төвд байршилтай барилга балгас болж, зөвхөн нэг давхрын зарим хэсгийг ашиглаж байгаа юм. Засаж, ашиглах талаар асуухад "Буян" Б.Жаргалсайхан "Миний юм та нарт хамаагүй. Та нар шивэртэй оймсондоо л анхаар" гэсэн утгатай хариулт өгдөг юм. Харин энэ талаар Хотын орлогч дуугараад эхэлжээ. 

Хотын орлогч Б.Номинчимэг: 

-"Хангай" зочид буудлын барилга балгас болоод 30 гаруй жил болж байна. Хотын төв цэгт, хамгийн үнэ цэнтэй байршилд байдаг балгасыг нураах, дахин төлөвлөх цаг болсон гэж бодож байна. Доод нэгдүгээр давхрыг нь Б.Жаргалсайхан, "Номин"--гийн Ш.Баярсайхан нарын хамтарсан компани эзэмшиж түрээсэлдэг. Балгас болсон хэсэг нь үл хөдлөхөөр бүртгүүлсэн мөртлөө улсад ямар ч татвар төлөлгүй. 

Дахин төлөвлөх талаар хөндөхөөр эзэмшигч нь "Та нарт ямар хамаатай юм" гээд хөдөлдөггүй. Хот дүрэмтэй, барилга нь өнгө үзэмжтэй байх хэрэгтэй. Зарчмын асуудал ярихаар загнаад өнгөрдөг үе ард хоцорсон. Бусдад сүрхий шаардлага тавьдаг хүн өөртөө ганц удаа шаардлага тавиад балгас болсон барилгаа цэгцэлмээр байна гэжээ. 

---