Гурван шугам бүхий метротой болох ажил 2024 оноос эхэлнэ

Нийслэл Улаанбаатар хот үүсэн байгуулагдсаны түүхт 384 жилийн ойг тохиолдуулан Нийслэлийн Засаг дарга бөгөөд Улаанбаатар хотын захирагчаар томилогдсон Х.Нямбаатар өөрийн авч хэрэгжүүлэх гэж буй дөрвөн цогц бодлого танилцууллаа. Үүнд түгжрэлийг бууруулах том бодлого багтжээ.

Юуны түрүүнд хязгааргүй орж ирж байгаа импортын автомашиныг хязгаарлах бодлого баримтлах юм байна. Үнийг хэрэгжүүлэхгүйгээр авто замын сүлжээг өрсөсгөх, тойрог, хурдын замууд байгуулах, холбоос тойрог замуудыг нэмэх байдлаар түгжрэлийн асуудлыг шийдвэрлэж чадахгүй гэж Хотын дарга хатуу итгэж байна. 

Удаад нь, хотын төвд "төлбөртэй бүс" байгуулахаар болжээ. Нийслэлийн Засаг дарга Х.Нямбаатар "Баруун 4 замаас Зүүн 4 зам, 32-ын тойргоос Энхтайвны гүүр хүртэлх бүсийг автомашины "Төлбөртэй бүс" болгоно. Нийслэлийн төв цэгээс 800м-т байрлах төлбөргүй зогсоол дээр машинаа тавиад, алхах, такси барих, дугуй, скүүтэр унах нөхцөлийг хангахаар ажиллаж байна" гэв. 

Гурав дахь том бодлого нь, ирэх жилээс гурван шугам бүхий метроны төсөл хэрэгжүүлнэ гэдгээ Хотын дарга амлалаа. Тэрбээр,  

-Монгол Улсын Ерөнхий сайд, БНХАУ-ын Ерөнхий сайдтай хийсэн уулзалтын үеэр БНХАУ-ын төрийн өмчит метро барьдаг компаниудтай хамтран ажиллах, уулзалтыг ойрын үед хийхээр болсон. Миний бие хэлэлцээрийн ширээг ахалж сууя гэсэн бодолтой байгаа. Засгийн газрын гишүүнээр ажиллаж байсан маань туршлага болох байх аа гэж бодож байгаа гэсэн юм.