Хилийн чанадад өдгөө 200 гаруй мянган монгол иргэн ажиллаж амьдарч байгаагаас хамгийн олон нь БНСУ болон АНУ-д байна. Тодруулж хэлбэл, АНУ-д 40 гаруй мянган монгол иргэн ажиллаж амьдарч байна. Энэ ч утгаараа сүүлийн жилүүдэд баяр наадмыг өргөн дэлгэр маш сайхан зохион байгуулалттай хийдэг болжээ. 

Вашингтон орчмын монголчуудын монгол наадмыг Вашингтон орчмын монголчуудын холбоо, АНУ дахь Элчин сайдын яам, Вашингтон орчмын монгол уран бүтээлчдийн нэгдэл ТББ болон бизнес эрхлэгчид хамтран "Эв нэгдэл, эрх чөлөө" уриан дор зохион байгуулжээ. Монгол наадамд 2000 иргэн оролцож, эх орондоо очсон мэт хуримлан цэнгэлдсэн байна.  

Вашингтон ДС орчмын наадам Монгол төрийн далбаагаа мандуулах ёслол, шагай болон нум сум харваагаар эхэлсэн байна. Монголын шагайн холбооны АНУ дахь салбар холбооны тэргүүн Ц.Жамъянсүрэнгийн мэдээлснээр тус холбоонд долоон хотын 100-150 харваач хамрагддаг аж. 

Монгол улсаас АНУ-д суугаа Онц бөгөөд бүрэн эрхэт Элчин сайд Ө.Батбаяр нээлтийн үгэндээ: 

-Монгол Улсын чухал гурав дахь хөрш АНУ-тай хөгжүүлж буй стратегийн түншлэл, жилээс жилд өргөжин гүнзгийрч байна. Монгол улсын Засгийн газрын "Алсын хараа" 2050 урт хугацааны хөгжлийн бодлого, Шинэ сэргэлтийн бодлого зэргийн хүрээнд хэрэгжүүлсэн Монгол Улсын эдийн засгийн болон бусад хөгжлийн бодлогыг АНУ-ын Байден, Харрисийн Засаг захиргааны тэргүүлэх бодлоготой уялдуулан, Монгол-Америкийн ард түмний сайн сайхан, харилцан ашигтай хамтын ажиллагааг хөгжүүлэхийн тулд хоёр тал хамтран ажиллаж байна хэмээн онцолжээ. 

Вашингтон ДС орчмын наадамд монгол үндэстнүүд тэр дундаа буриад, халимаг, өвөрмонголчууд оролцсоноороо тун онцлогтой боллоо. Мөн анх удаагаа морьтой наадсанаар Монгол наадам утга агуулгын хувьд бүрэн бүтэн болж чаджээ. 

АНУ дахь Монгол улсын ЭСЯ-ны Консулын хэлтсийн дарга О.Эрдэнэсамбуу "Монгол наадамд 250 уран бүтээлч оролцсон нь баяр наадам өргөн дэлгэр, өндөр зохион байгуулалттай болсныг харуулж байна. Вашингтон ДС орчмын монголчууд маань эв нэгдэлтэй, гар нийлж ажилладаг. Элчин сайдын яамны хувьд тэднийг зангидах, нэгтгэх гол зорилготой. Зохион байгуулалтын ажлыг иргэд маань өөрсдөө хийдэг" гэсэн юм. 

Ийнхүү Вашингтон ДС орчмын монголчууд 23 дахь жилдээ баярлан наадлаа. Урлаг соёлын арга хэмжээ мэргэжлийн түвшинд зохион байгуулагдаж, хурдан морь, хүчит бөх, нум сум, шагайн харваатай өргөн дэлгэр сайхан нааджээ. 

Хойтон жилийн наадам хол байна даа, хол байна. 

---