Цэцэрлэгийн шинжилгээ өгөхөөр 3-5 настнууд -25 хэмийн хүйтэнд гадаа дугаарлан зогсжээ

Улсын хэмжээнд хоёрдугаар сарын 14-нөөс бүх шатны сургалтын байгууллагууд танхимаар хичээллэх шийдвэрийг засгийн газраас гаргасан. Энэ дагуу 3-5 настай хүүхдүүд цэцэрлэгтээ явж эхэлнэ. Хүүхдүүд цэцэрлэгтээ хамрагдахдаа шээсний болон цагаан хорхойн шинжилгээ өгсөн байх ёстой.

Шинжилгээг цэцэрлэгүүд дүүргийнхээ эрүүл мэндийн төвтэй хамтран зохион байгуулж байгаа аж. Гэвч тус арга хэмжээ зохион байгуулалт муу байснаас үүдэн -25 хэмийн өвлийн хүйтэнд бага насны хүүхдүүд гадаа дугаарлан зогсож байна.

Цэцэрлэгийн танхимын сургалт эхлэхтэй холбоотой цахим системд бүртгэлтэй гурван настнууд, 2021 оны 12-р сараас хойш цэцэрлэгтээ яваагүй 4-5 настай хүүхдүүд гээд нийт 41 мянга орчим хүүхэд шинжилгээнд хамрагдаж байгаа юм. Эцэг эхчүүдийн зүгээс хүндрэл багатай учир хувийн эмнэлэгт шинжилгээ өгсөн ч заавал харьяа эрүүл мэндийн төвийн бичиг хүчинтэй хэмээн хүлээж авдаггүй гэдгийг бидэнд хэлж байлаа. Үүнээс үүдэн зарим цэцэрлэг дээр бөөгнөрөл үүсэн халдвар тархах бас нэгэн шалтгаан болж байна.

Зарим эцэг, эхчүүд хуурамч шинжилгээний бичиг үйлддэгтэй холбоотойгоор хувийн лабораторид өгсөн шинжилгээг хүлээн зөвшөөрдөггүй байна. Улмаар цэцэрлэгийн шинжилгээ жилийн жилд хүндрэл дараалал үүсгэн эцэг эхчүүдийн бухимдлыг төрүүлдэг байна.

/Хан-Уул дүүргийн 53, 67-р цэцэрлэгийн нөхцөл байдал 2022.02.10/

/Зургийг иргэн Намсрайжав Баянбатын цахим хуудаснаас авав/