Колумбид хөрсний гулгалтын улмаас 11 хүн амиа алджээ
Колумбийн төв хэсэгт их хэмжээний аадар бороо орж, хөрсний гулгалт үүссэний улмаас 11 хүн амь үрэгджээ. Мөн 35 хүн бэртэж гэмтсэн бөгөөд тэднийг яаралтай эмнэлэгт хүргэсэн болохыг албаныхан мэдээлсэн юм.
Рисаралда мужийн Доскебрадас хотод өнгөрөгч мягмар гарагт болсон энэхүү байгалийн гамшгийн улмаас хэд хэдэн байшин, барилга сүйдсэн бөгөөд ойролцоох бүс нутгийн оршин суугчдыг аюулгүй газарт нүүлгэн шилжүүлсэн байна.
Энэхүү явдлын гэрч Дуберней Эрнандес "Би маш чанга чимээ сонсоод гарч харахад уулын нэг хэсэг байшингууд дээр унасан байсан. Олон хүн нуранги дор дарагдсан, үнэхээр аймшигтай байсан" хэмээн "AFP" агентлагт ярьжээ.
Орон нутгийн Гамшгаас хамгаалах албаны аврах багийнхан шаварт дарагдсан иргэдийг гаргаж авахаар хайсаар байгаа хэдий ч амьд үлдсэн хүнийг олох найдвар бага байгаа ба амиа алдагсдын тоо цаашид нэмэгдэнэ гэж эмээж байна.
Колумби улсад хөрсний гулгалт тогтмол тохиолддог бөгөөд эгц толгод дээр баригдсан байшингууд борооны улиралд онцгой эрсдэлтэй байдаг билээ. Хоёр жилийн өмнө өмнөд нутгийн Путумайо мужийн Мокоа хотод хөрсний гулгалт болох үеэр 250 гаруй хүн амиа алдсан юм.
Эх сурвалж: BBC
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.