Бусдыг эрүүдэн шүүж, хэрэг хүлээлгэсэн цагдаа нарт торгох ял ногдуулав

Эзэн холбогдогч нь тодорхойгүй эрүүгийн хэргүүдийг жирийн иргэнд тохсон гурван цагдаагийн хэргийг Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхээр хэлэлцэж, торгуулийн ял оноолоо. 

Сонгинохайрхан дүүргийн Цагдаагийн 1-р хэлтсийн мөрдөгчөөр ажиллаж байсан Д.Чинбат, Д.Батцэнгэл, Г.Гандалай нар нь иргэн Д-д 15 хэргийг нотлох баримтыг хуурамчаар үйлдэж, эрүүдэн шүүж, хилсээр тохсон нь ийнхүү нотлогдлоо. 

Тэдэд Эрүүгийн хуулийн тусгай ангийн 21.1 дүгээр зүйлийн 1 дэх хэсэг /нотлох баримт хуурамчаар үйлдэх, устгах/ мөн хуулийн 21.12 дугаар зүйлийн 1 дэх хэсэгт заасан /эрүү шүүлт тулгах/ хэрэгт буруутгасан юм. 
Шүүгдэгч Д.Чинбат, Д.Батцэнгэл, Г.Гандалай нарыг гэм буруутайд тооцож, шүүгдэгч тус бүрийг 10 сая төгрөгийн торгох ялаар, шүүгдэгч Г.Гандалайг ЭХТА-ийн 21.1 дүгээр зүйлийн 2 дахь хэсэгт заасан гэмт хэрэг үйлдсэн гэм буруутайд тооцож, 7.500.000 төгрөгөөр торгох ялаар, шүүгдэгч Д.Чинбат, Д.Батцэнгэл нарт тус бүрт нь 6.500.000 төгрөгөөр торгох ял оногдуулж, шүүгдэгч Г.Гандалайг нийт 17.500.000 төгрөгөөр, Д.Чинбат, Д.Батцэнгэл нарыг нийт 16.500.000 торгох ялаар тус тус шийтгэж шийдвэрлэжээ.