Шинэ сайдуудын сураг

УИХ-ын гишүүн Т.Доржханд, Ш.Адышаа, Б.Ганибал нарын гурван гишүүн ҮХНӨ-ийн 39 дүгээр зүйлийн 1 дэх хэсэгтэй холбоотойгоор Үндсэн хуулийн цэцэд гомдол гаргасан нь олны анхаарлаас гадуур байх шиг. Энэхүү гомдол хэрхэн шийдэгдсэнээс Засгийн газарт өөрчлөлт орох уу гэдэг асуудал шийдэгдэх гэж байна.

Цэцийн дунд суудлын хуралдаан өчигдөр болох ёстой байсан боловч, тодорхойгүй хугацаагаар хойшлоод байна.

Дээрх гурван гишүүн ҮХНӨ-өөр батлагдсан “Засгийн газрын дөрвөөс илүүгүй гишүүн УИХ-ын гишүүний албан тушаалыг хавсарч болно” гэж өөрчилсөн нь Үндсэн хууль зөрчсөн гэж үзсэн байна.

Үндсэн хуулийн цэцэд гаргадаг Т.Доржханд гишүүний гомдол “ажил, хэрэг” болчих гээд байдаг. Түүний өмнө нь “Монгол улсын Ерөнхийлөгчөөр сонгогдсон хүн дахин нэр дэвших эрхгүй” гэх гомдол “ажил, хэрэг” болсноор Ерөнхийлөгч Х.Баттулга дахин нэр дэвшиж чадаагүй билээ.

Энэ удаад ч тэрээр Засгийн газрын гишүүдэд өөрчлөлт оруулж мэдэхээр гомдлыг өргөн барьсан байна. Үүнтэй холбогдуулаад, зарим хэвлэл мэдээллийн хэрэгслүүдээр Засгийн газрын шинэ сайд нарын нэр дуулдаж эхэлжээ.

Эх сурвалжуудын батлан хэлж байгаагаар, ҮХЦ тэрхүү гомдлыг хүлээн авах өндөр магадлалтай бөгөөд Засгийн газрын гишүүдийг УИХ-ын гишүүд хавсарч болно /дөрвөөс илүүгүй гэж хязгаарлахгүйгээр/ хэмээн шийдвэрлэнэ гэдэгт итгэлтэй байгаа аж.

Иймд шинэ сайдад Ж.Мөнхбат, С.Бямбацогт, Д.Чойжилсүрэн, Н.Учрал, М.Оюунчимэг, Г.Мөнхцэцэг, Т.Аубакир нарын нэр дуулдаж байна. Тухайлбал, Тэргүүн шадар сайдад Ж.Мөнхбат, Шадар сайдад С.Бямбацогт, Эдийн засаг, хөгжлийн сайдад Д.Чойжилсүрэн, Цахим бодлогын сайдад Н.Учрал, Байгаль орчин, аялал жуулчлалын сайдад М.Оюунчимэг, Соёлын сайдад Г.Мөнхцэцэг, Барилга, хот байгуулалтын сайдад Т.Аубакир нарын нэр яригдаж байгаа дуулдлаа.

Засгийн газрын бүтцэд өөрчлөлт оруулах гол учиг нь давхар дээлгүй, улс төрийн туршлагагүй сайд нар “зангараггүй, төрийн ажлын туршлагагүй байна” хэмээн үзэж байгаа гэв. МАН-ын Удирдах зөвлөл, УИХ дахь МАН-ын бүлэг, зарим гишүүд үүнтэй санал нэг байгаагаа илэрхийлээд эхэлчихжээ.