LIVE: Гэрээр тусгаарлагдаж байгаа иргэд эрүүл мэндийн тусламж, үйлчилгээ авч чадахгүй хохирч байна

Өнөөдрийн байдлаар эмнэлэгт хэвтэх үү, гэрийн хяналтад байх уу гэдэг нь шийдэгдээгүй 3000 гаруй хүн байгаа юм. Түүнчлэн гэрийн хяналтад 7900 гаруй хүн байгаа мэдээллийг ЭМЯ-наас өгсөн.

Эдгээр иргэдийн биеийн байдал, тусламж үйлчилгээг дүүрэг, өрхийн эмнэлэг хариуцаж ажиллаж байгаа юм. Гэтэл дээрх төвүүд халдвартай иргэдэд тусламж үйлчилгээ, зөвлөгөө, мэдээллийг хангалттай өгч чадахгүй байгаад иргэд шүүмжилж байна.

ХУД-т байрлах “Хурд” хороололд гэртээ тусгаарлагдаж байгаа иргэнтэй утсаар тодруулга авахад: Манай гэрээс би манай хоёр хүүхэд энэ сарын 24-нд шинжилгээ өгөхөд эерэг гарсан. Эхэндээ халуурч байгаад одоо зовуурь алга болж байна. Хүүхдүүд маань бол ханиалгаад халуунтай байгаа. Өрхийн эмнэлэг рүүгээ утастаж байж ямар эм уух талаар лавлаж асуусан. Эмээ хэрхэн авах вэ гэхэд өөрсдөө гараад эмийн сангаас ав гэсэн. Халдвартай иргэдийг гэрээсээ битгий гараарай гэж анхааруулж байхад өрхийн эмнэлгийн эмч нь гэрээсээ гараад эм, тариагаа ав гэж байна. Уул нь өрхийн эмнэлгээс эм, тариаг нь дөхүүлж өгнө гэсэн биз дээ. Халдвартай гэртээ байгаа иргэд эмнэлгийн тусламж, үйлчилгээ авч чадахгүй байна. Гэрээр тусгаарлагдаж байгаа иргэд эрүүл мэндийн тусламж, үйлчилгээ авч чадахгүй хохирч байна гэсэн юм.