Мьянмарын жагсагчид Хятадын үйлдвэрүүдийг шатаажээ
Мьянмарын төрийн эргэлтийг эсэргүүцсэн босогчид Янгон хот дахь БНХАУ-ын санхүүжилттэй үйлдвэрүүдийг галдан шатаажээ. Хятад улс нь Мьянмарын засгийн эрхийг авсан цэргийн хунтын дэглэмийн удирдагчдыг дэмжиж байгаа гэж жагсагчид үзэж байгаа юм.
Ням гарагт гарсан энэ хэргийн дараа аюулгүй байдлын хүчнийхэн дор хаяж 22 иргэнийг хөнөөсөн бөгөөд тус улсын өөр бусад газар нутагт 16 жагсагч амиа алдсан гэж орон нутгийн Улс төрийн хоригдлуудад туслах нийгэмлэг мэдэгджээ. Мөн мөргөлдөөний үеэр нэг цагдаагийн алба хаагч амиа алдсан аж.
Жагсагчид Янгон хотын аж үйлдвэрийн, ядуу буурай Хлайнгтая хотын захын дөрвөн оёдлын үйлдвэр болон бордооны үйлдвэрийг галдан шатаасан бөгөөд нийт 2,000 орчим хүн гал унтраах машинуудыг хаан зогсож, нэвтрүүлээгүй байна. Ингээд үйлдвэрийн бүсээс утаа униар ихсэж эхлэхэд аюулгүй байдлын албаныхан босогчид руу гал нээсэн гэж орон нутгийн хэвлэлүүд мэдээлжээ.
Оёдлын үйлдвэрүүдэд гал гарах үеэр олон хятад ажилтан барилга дотор гацан, шархадсан гэж БНХАУ-ын Элчин сайдын яамнаас мэдэгдсэн бөгөөд Мьянмар улсыг Хятадын өмч, иргэдийг хамгаалахыг хүссэн байна. Тус яамны мэдэгдэлд "БНХАУ Мьянмар улсад болж буй бүх хүчирхийллийг нэн даруй таслан зогсоож, хэрэгтнүүдийг хуулийн дагуу шийтгэн, Мьянмар дахь Хятадын компани болон ажилчдын амь нас, эд хөрөнгийн аюулгүй байдлыг хангах чиглэлээр үр дүнтэй арга хэмжээ авахыг эрх баригчдаас шаардаж байна" хэмээн тэмдэглэжээ.
Эх сурвалж: Reuters
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.