Хэд хэдэн хүнд амны хаалтыг хямд үнээр зарна гэж амлаад, тэднээс 200 сая гаруй вон луйвардсан Өмнөд Солонгосын эрэгтэйд хоёр жилийн хорих ял оноосон болохыг орон нутгийн шүүхээс мэдээлэв.

48 настай хэрэгтэн луйврын аргаар олсон мөнгөөрөө хувийн өр төлбөрөө төлж, зугаа цэнгэлийн зардалдаа ашигласан аж. Тэгү хотын дүүргийн шүүхээс "Шүүгдэгчийн гэмт хэргийн түүхийг харахад тус этгээд нь хэргийг давтан үйлдэх өндөр магадлалтай байгаа тул хатуу шийтгэл шаардлагатай" хэмээн мэдэгдсэн байна.

Энэхүү залилангийн хэрэг коронавирусийн цар тахлын эхэн үед, БНСУ-д амны хаалтын дутагдал үүсээд байхад гарчээ. Уг эрэгтэй өнгөрсөн оны хоёрдугаар сард нэг хохирогчид тус улсын хамгийн том амны хаалт үйлдвэрлэгчээс амны хаалт нийлүүлнэ хэмээн амлаад, 109 сая гаруй вон авсан байна. Тэрээр мөн өөр нэг хохирогчид амны хаалтын экспортын бизнес эхлүүлнэ гэж хэлээд 84 сая вон зээлжээ. Түүний эдгээр хуурамч амлалтад итгэсэн өөр хоёр хохирогч 5.2 сая вон болон 6 сая воноо тус тус алдсан байна.

Эх сурвалж: Yonhap News Agency

---