ЭМЯ-аас коронавирусийн халдварын нөхцөл байдлын талаар ээлжит мэдээллээ хийлээ.

ХӨСҮТ-ийн Тандалт, судалгааны албаны дарга А.Амбасэлмаа: "Арванхоёрдугаар сарын 22-ны өдөр ХӨСҮТ-ийн вирус судлалын гурван лаборатори, Дархан-Уул, Сэлэнгэ, Орхон аймгийн салбар лабораторид нийтдээ 4,134 хүнд шинжилгээ хийснээс 57 хүний шинжилгээнд коронавирус илэрсэн.

Үүний 55 тохиолдол нь Улаанбаатар хотын Баянзүрх дүүргийн нэгдсэн эмнэлэгтэй холбогдолтой бөгөөд тэдний 43 нь өвчтөн, ес нь сахиур, хоёр нь гэр бүлийн хүн, нэг нь захиргаа аж ахуйн ажилтан, харин нэг нь эмнэлгээс гарсан хүн юм.

Үлдсэн нэг тохиолдол нь Сэлэнгэ аймгийн нэг хүний давтан шинжилгээнээс илэрсэн бол бас нэг тохиолдол нь Цэргийн төв эмнэлгийн ажилтнаас илэрсэн.

Улаанбаатар хотод нийт батлагдсан тохиолдол 274 болсон. Ингээд Монгол Улсын хэмжээнд батлагдсан тохиолдол нийт 1,063 болж, 541 хүн эдгэрэн, 513 хүн эмчлэгдэж байна.

Баянзүрх дүүргийн нэгдсэн эмнэлгийн батлагдсан тохиолдлын ойрын хавьтал, хоёрдогч хавьтал болон хавьтал болоогүй хүмүүсийг тус тусад нь тусгаарласан байгаа. Эмнэлгээс гарсан хүмүүсийг тандан судалж байгаа бөгөөд бүгдийг нь дуудаж, шинжилгээнд оруулсан.

Ойрын хавьтлын нийт 1350 хүнийг тусгаарлан, шинжилгээ авсан бол хоёрдогч хавьтлын 800 гаруй хүн байгаа. Батлагдсан тохиолдлын хэвтэн эмчлүүлсэн тасаг нь насанд хүрэгчдийнх байсан тул халдвар авсан хүмүүс дунд хүүхэд байхгүй" гэв.

ЭМЯ-ны төрийн нарийн бичгийн дарга Я.Амаржаргал: "Баянзүрх дүүргийн 90 гаруй мянган өрхийн нэг хүнээс шинжилгээ авч байгаа. Улаанбаатар хотын хэмжээнд 19 цэг дээр шинжилгээ авч ажиллаж байгаа. Шинжилгээний явцад ямар нэгэн алдаа дутагдал өнөөдрийн байдлаар гараагүй байна.

Улаанбаатараас шинжилгээ өгөөгүй нэг ч иргэн гараагүй байгаа. Цахим программ гацсантай холбоотой хүлээлт өмнө нь үүсээд байсан бол одоо ямар ч асуудалгүй болсон. Монгол Улс шинжилгээний хүчин чадлын хувьд боломжийн ажиллаж байгаа" гэсэн юм.

Гадаад харилцааны яамны Консулын газрын захирал Л. Мөнхтүшиг: "Арванхоёрдугаар сарын 21-ний байдлаар нийт 27,729 иргэнийг эх орондоо авчраад байна. Энэ сард 542 иргэнийг тусгай үүргийн нислэгээр авчирсан. Ийнхүү энэ оны тусгай үүргийн нислэгүүд дууслаа.

Бид нутаг буцах хүсэлтэй иргэдийн хүсэлтийг тогтмол хүлээж авч байгаа. Ойролцоогоор 30 орны хоёр мянган иргэн яаралтай ирэх хүсэлт ирүүлсэн. Тэдний 1,500 орчим нь БНСУ-д байгаа. Тиймээс дараагийн нислэгийг Өмнөд Солонгос улс руу үйлдэх болно. Гэвч одоогоор тусгаарлах байрны нөөц хүрэлцэхгүй байгаа тул ирэх сарын нислэгийн төлөвлөгөө хараахан батлагдаагүй байна" гэлээ.

---