Эсватинийн Ерөнхий сайд коронавирусээр нас баржээ
Африкийн сүүлчийн хэмжээгүй эрхт хаант засаглалтай улс болох Эсватинийн Вант Улсын Ерөнхий сайд Амброуз Дламини коронавирусийн халдвар аваад байсан бөгөөд өнгөрөгч ням гарагт Өмнөд Африкийн эмнэлэгт нас барсан болохыг Эсватинийн Засгийн газраас мэдэгджээ.
52 настай Дламини энэ сарын сарын эхээр хөрш Өмнөд Африкийн эмнэлэгт хэвтэн эмчлүүлж байжээ. Тэрээр арваннэгдүгээр сарын дундуур халдвар авснаа зарлан, биеийн байдал нь сайн, ямар нэгэн шинж тэмдэг илрээгүй хэмээн мэдэгдэж байсан юм.
Улс төрд шинээр хөл тавьсан бизнесмен Дламини 2018 оны аравдугаар сард Ерөнхий сайдаар томилогджээ. 1986 оноос хойш засгийн эрх барьж байгаа одоогийн хаан бүх сайд нарыг нэрлэж, Парламентад хяналт тавьдаг тул тус улсын Засгийн газрын тэргүүний үүрэг хязгаарлагдмал байдаг аж.
1.2 сая хүн амтай Эсватинийн вант улсад одоогийн байдлаар нийт 6,700 гаруй коронавирусийн халдварын тохиолдол бүртгэгдэн, 127 хүн нас бараад байгаа. Тэгвэл Өмнөд Африкт байрладаг "Свазиландын эв нэгдлийн сүлжээ" нэртэй иргэний нийгмийн нэгдэл Эсватинийн Засгийн газрыг Ерөнхий сайд Амброуз Дламинийг эрүүл мэндийн илүү өндөр хөгжилтэй улс руу нүүлгэн шилжүүлж, тусгайлан харьцсан гэж буруутгаж байгаа юм.
Эх сурвалж: AFP
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.