Коронавирусийн халдвартай иргэн зугтах гэж оролджээ
Сэлэнгэ аймгийн Сүхбаатар сумын иргэн Б коронавирусийн халдвартайгаа мэдсэн даруйдаа гэрээсээ оргосон хэрэг өчигдөр гарчээ.
Зугтахыг завдсан иргэн нь Сэлэнгэ аймгийн Сүхбаатар суманд амьдардаг, 50 гаруй насны хүн бөгөөд түүний дүү Н-ээс нь 12 дугаар сарын 1-нд коронавирусний халдвар илэрч, батлагдан эмнэлэгт хүргэгдээд байжээ. Улмаар дүү Н-ийн ойрын хавьтал болох хоёр хүүхэд, ах иргэн Б нараас шинжилгээ авахад гурван хүний шинжилгээний хариу нь эерэг буюу халдвартай гарсан байна. Хариу гарсны дараа Аймгийн онцгой комиссын зүгээс холбогдон, эмнэлгийн байгууллагад хүргэх тухай мэдэгдээд тархварын судалгааны хуудсын асуумжийг бөглүүлсэн аж.
Гэтэл иргэн Б энэ хооронд "хашаандаа нойл орчихоод ирье" гэж гараад зугтсан бөгөөд Аймгийн онцгой комиссын зүгээс шуурхай арга хэмжээ авч, цагдаагийн алба хаагчдад мэдэгдсэнээр нэн даруй саатуулсан байна.
Цагдаагийн алба хаагчид тухайн иргэний гэрийг эхний халдвар батлагдсаны дараа албан ёсоор хамгаалалтад авсан байсан ч иргэн Б хашаанаасаа гарч зугтан, гэр байрлах гудамжнаасаа баригджээ. Иргэн Б-г тусгай багаж ашиглан саатуулсан бөгөөд барьсныхаа дараа хамгаалах хувцас өмсгөн эрсдэлгүй болгосон аж.
Иргэн Б гэрээсээ холдоогүй саатуулагдсан ч түүний явсан маршрутыг тогтоохоор Аймгийн онцгой комисс тандалт явуулж эхлээд байна.
Зугтсан иргэний дүү Н эмнэлэгт хүргэгдээд хоёр хоносон байсан тул түүний хүүхдүүдэд Сүхбаатар сумын ЗДТГ-аас хоол хүнс, нүүрс түлээ хүргэж өгч байжээ.
Түүнээс яагаад зугтсаныг асуухад “Коронавирусний халдвартай гэдгээ мэдээд” айсан хэмээн хариулсан аж.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.