“what3words” Монголын аялал жуулчлалыг хөгжүүлнэ

Монголын нүүдэлчид ойр ойрхон бууриа сэлгэх нь уламжлалт соёл. Нүүдлийн соёл иргэншилд дурлагчид суурин хаягаа цахим ертөнцөд бүртгүүлж түүгээр дамжин бусадтай харилцах санаагаа орхих нь зүйтэй. Учир нь Монголд нэг газарт хаягаа бүртгүүлсэн ч төд удалгүй нүүж өөр газарт суурьших хэрэгтэй болдог.

Байршил тогтоогчоор таныг Монголоос олох амаргүй. Гэхдээ “what3words” аппликэйшнээр дамжуулан Монголын тал нутгийн хаа ч байсан нэгнээ олж уулзах хялбар болно.

Уг аппликэйшнийг 2013 онд Британийн Лондон хотод гарааны бизнес эрхлэгчид зохион бүтээж, дэлхийн нийт газар нутгийг 57 их наяд квадрат болгон хуваасан. Квадрат тал бүр гурван метр хэмжээтэй, гурван үгээр нэрлэсэн хаягтай.

Үүнийг “шинэ үеийн ухаалаг GPS” ч гэж ойлгож болно гэж тус аппликэйшний маркетинг хариуцсан ахлах ажилтан Жилс Райс Жонс ярьжээ. “Үнэн хэрэгтээ гудамж, газруудын нэр хаяг тодорхойгүй, хүний нүдэнд харагдахаар байршуулсан нь ховор. Тиймээс “what3words” буюу гурван үг ашиглаад л байршил тогтоох илүү хялбар бас шинэлэг” гэж тэрээр хэлсэн байна.

Монголчууд уг аппликэйшнийг 2016 оноос хэрэглэж эхэлсэн. Банк, такси, пицца хүргэлтийн компаниуд голлон ашигладаг. Дурын хэрэглэгч программыг татаж кодоо илгээх боломжтой.

Тухайлбал цаатнууд бараг сар бүр нүүж байршлаа сэлгэдэг. Нүүх бүртээ байршлаа тодорхойлсон гурван үгийг гэр бүлийнхэндээ, орон нутгийн байгууллагад илгээснээр аялал жуулчлалын салбарт ахиц дэвшил гарах боломжтой аж. Монголчууд аялал жуулчлалын салбараа хөгжүүлэх сонирхолтой. Тэд хаа яваа, хаана нүүдэллэж бууснаа гурван үгээр илэрхийлж тогтоосноор жуулчдад уламжлалт соёлоо таниулахад хялбар болно гэж Райс Жонс үзжээ.

Аялагчид Тайгад амьдардаг цаатнууд, Алтай Тайван Богдод аж төрдөг нүүдэлчдийн аль нэгийг сонгож төөрөх, эрсдэлд орохоос эмээлгүй нүүдэлчин ахуйтай танилцах боломж нээгдэх аж.

Эх сурвалж: www.qz.com