“Үндэсний шуудан” сонины өчигдрийн дугаарт УИХ дахь АН-ын бүлгийн дарга, УИХ-ын гишүүн Д.Эрдэнэбатын Аж үйлдвэрийн сайд байхдаа хууль зөрчиж олгосон байж болзошгүй 7.3 тэрбум төгрөгийн зээлийн асуудлыг баримтаар гаргаж ирсэн. Энэхүү мөнгө нь сонгуульд зарцуулагдсан байж болзошгүй гэж хардаж байгаагаа ч нуугаагүй.

Үүнтэй холбогдуулж, өчигдөр Д.Эрдэнэбат сэтгүүлчдэд “Жижиг дунд бизнес эрхлэгчдийг дэмжиж байсан явдал бий. Харин би хувийн компанидаа болон эхнэр, хүүхдэдээ зээл авч өгөөгүй. Журмын дагуу зээл олгосон. Тухайн үед зээл авсан зээлдэгчдийн 60-70 хувь нь жирийн иргэн байна. Энэ бузар улстөрийн үйл ажиллагаандаа миний гэр бүлийг битгий татан оролцуулаарай” гэж мэдэгдсэн нь цацагдаад байгаа.

Д.Эрдэнэбат буруугүй юу, тэр үнэхээр шударга нэгэн үү?

Өнөөдөрийн “Үндэсний шуудан” сонинд “хариу тайлбар”-ыг Сангийн яамны Санхүүгийн хяналт, шалгалтын хэлтсийн улсын ахлах байцаагч Г.Янжинсүрэнгийн яриагаар шулуухан өгжээ. Г.Янжинсүрэн “2015, 2016 онд Аж үйлдвэрийн сайдын тушаалаар олгосон 23.1 тэрбум төгрөгийн зээлийн асуудал бий. Үүнээс 2015 онд 7.3 тэрбум төгрөгийг сонгон шалгаруулалтгүй олгосон гэх үндэслэл байгаа” гэж хэллээ.

Сонгон шалгаруулалтгүй олгосон байж болзошгүй энэхүү 7.3 тэрбум төгрөгийг сонгон шалгаруулалтын шалгуураар оруулсан эсэх нь тодорхойгүй, зээлийн хурлын шийдвэр байхгүй, санхүүгийн баримтыг зохих журмын дагуу бүрдүүлээгүй олгосон зэрэг зөрчил илрээд байгаа аж.

Иймээс УИХ дахь АН-ын бүлгийн дарга Д.Эрдэнэбатыг бусдынх нь адил Авлигатай тэмцэх газар, Нийслэлийн Прокурорын газрын хяналтын дор шалгах нь шударга үнэнд нийцэх нь ээ.

---