Монгол ардын болон уртын дуугаар уран бүтээлийнхээ урын санг баяжуулж яваа дуучин бол Б.Алтанжаргал. Тэрбээр анх “Дүүриймаа” дуугаар олонд танигдан өөрийн сонсогч фэнүүдтэй болсон. Дуучин залуугийн урлагийн ертөнцөд хөл тавьсан замнал нь тун сонирхолтой. Тэрбээр дунд сургуульд байхдаа морин тойруулгад хичээллэдэг байжээ. Түүнийг СУИС-ийн дуулаачийн ангийг дүүргэсний дараахан Циркт хамт хичээллэдэг байсан нөхөд нь циркийн морин шоунд тоглооч гэсэн санал тавьснаар циркчин болж гурван жил морин дээр үзүүлбэр үзүүлсэн гэдэг. Хурдны морь унаж өссөн түүний хувьд морин циркийн үзүүлбэр сонирхолтой санагдсан учир тоглолтын багт жүжигчнээр орж Тайвань улсыг зорьж байжээ.

Б.Алтанжаргал наймдугаар ангидаа Завхан аймгийн Алдархаан сумын уугуул, МУГЖ Б.Лхамжав гуайн нэрэмжит уралдаан зарлахад Улаанбаатар хотод ирж оролцон байр эзлэхэд нь СУИС-ийн уртын дууны ангийн багш Ц.Дэлгэр шүүгчээр ажиллахдаа хараад “Аравдугаар ангиа төгсөөд над дээр ирээрэй” хэмээн зөвлөснөөр дуучин болох анхны замналаа тавьжээ. Оюутан байхдаа “Asian shop” хамтлагийг үүсгэн байгуулалцаж дуучнаар ажиллахад багш нь ихэд дургүйцэж “Уртын дуучин болох байж поп хамтлагт яагаад дуулж байгаа юм” гэж зэмлэсэн тул тэрбээр уртын дуучнаар сэтгэл шулуудан суралцсан байна. Ээжийгээ асрангаа Багануур дүүрэг дэх “Багануур” хувьцаат компанийн уурхайд экскаваторын жолоочоор ажилладаг байсан тэрбээр арван жилийн дараа уран бүтээл рүүгээ шаргуу орж “Ганган хул” ардын дууг электро хөгжимтэй хослуулан, клипийг нь “Color music” продакшнаар хийлгэж цацсан нь үзэгч, сонсогчдод их таалагджээ.

Дуучин залуугийн урлагийн ертөнцөд хөл тавьсан замнал нь тун сонирхолтой

Түүнээс хойш ажиллахынхаа хажуугаар арван ардын дуу дуулж олны сонорт хүргэсэн нь “Дүүриймаа”, “Янлин хуар”, “Ганган хул”, “Сэр сэр салхи”, “Өдтэй бичиг”, “Хайлуур мөрөн”, “Цэнхэрлэн харагдах уулс”, МУГЖ Т.Баясгалантай хамтран дуулсан “Аргагүй амраг”, “Зуун лангийн жороо луус”, ӨМӨЗО-ны алдарт дуучин Лхасүрэн, Халимагийн нэрт туульч О.Цагаанзам, дуучин Д.Жавхаасайхан, Д.Бурмаа, А.Түмэн-Өлзий нартай хамтран “Гандий мод” дуу юм.

Мөн 2009 онд дөрвөн уран бүтээлчидтэй хамтран “Тэгш таван өнгө” тайлан тоглолт Монгол Бөхийн Өргөөнд хийж, телевизүүдийн Цагаан сар, Наадмын баярт зориулсан теле зохиомжуудад оролцон дуулж байв. Түүнд урам хайрлаж, хөглөдөг хүн бол уртын дуучин Д.Жавхаасайхан.

Тэд нэг ангийн андууд. Д.Жавхаасайхан ч найзыгаа урлагт нь буцаан оруулах гэж их хичээж зүтгэсэн нь талаар болоогүй гэдэг. Тэгвэл өдгөө олны хайртай дуучин болсон Б.Алтанжаргал “Дөмөн хонгор аялгуу” уран бүтээлийнхээ анхны бие даасан тоглолтоо Корпорэйт концертын танхимд 11 сарын 02-нд үзэгчдэд толилуулахаар болжээ. Түүний энэхүү тоглолтын нэрийг нэг нутгийн уран бүтээлч ах болох Ардын уран зохиолч, Хөдөлмөрийн Баатар Бавуугийн Лхагвасүрэн хайрласан гэнэ. Тоглолтын тасалбарын үнэ 40.000-60.000 төгрөгийн үнэтэй аж.

Тоглолтонд урилгаар
• Монгол улсын Морин хуурын чуулга, удирдаач Д.Түвшинсайхан 
• “Зун” мюзик продакшн 
• Натур даанс продакшн 
• Ч.Буянхишиг урлаг судлаач, СГЗ 
• Б.Ичинхорлоо Болор цомын эзэн, яруу найрагч
• Д.Жавхаасайхан дуучин, СТА
• Д.Үүрийнтуяа, дуучин, СТА 
• Э.Чулуунчимэг дуучин, СТА
• Б.Батцэцэглэн дуучин
• Д.Цэвэрцэцэг /Өвөр Монголын “Улаан мөчир” чуулгын дуучин/ нар оролцох гэнэ.  

 

 

 

 

---