Он гарсаар энэ сарын 27-ны өдрийн байдлаар нийт 42 удаагийн усны осол гарч, 30 хүн амь насаа алджээ. Үүнээс дөрөв нь хүүхэд, 26 нь том хүн байна. НОБГ-ын нийслэлийн Аврах анги 105-ын албан хаагч нар ес дэх жилдээ Туул голын Гачууртын Хар усан тохойгоос Биокомбинатын гүүр хүртэл завьт эргүүлийг хийж байна.

Энэ сарын 10-наас хойш завьт эргүүлийнхэн дөрвөн хүүхдийг голд живж байхад нь аварч хамгаалжээ. Тухайн үед эцэг, эхийн хараа хяналтгүй байдлаас үүдэн голд тоглож байсан хүүхэд нь хөл алдан усанд урсан, живж байх үед завьт эргүүлийнхэн эргүүлээ хийж явж тааран тухайн хүүхдүүдийн амь насыг аварсан байна.

Туул голын эрэг дагуу завьт эргүүл өглөөний 10:00-22:00 цагийн хооронд хоёр багт хуваагдан гол усны ослоос урьдчилан сэргийлэх сэрэмжлүүлгийг ирэх есдүгээр сарын 10-н хүртэл ард иргэдэд хүргэн ажиллах юм. 

Ард иргэд гол усны аюулаас урьдчилан сэргийлэх мэдээлэл, зөвлөмжийг хүргэж ажилладаг ч иргэдийн хайхрамжгүй байдлын үүднээс голын усанд эндэх тохиолдол буурахгүй байгааг албаны хүмүүс хэлж байлаа. 

 

 

---