Архангай аймгийн малчин 100 км-т 3 литр шатахуун зарцуулдаг машин бүтээжээ
Энэ хүн бол Архангай аймгийн Хашаат сумын иргэн “Төмөр” хочит Р.Дамба. Тэрбээр хятад мотоциклийн мотор, аксент машины хропыг хооронд нь нийлүүлж, 100 км замд ердөө 3 литр шатахуун зарцуулдаг, 300 кг ачаа тээвэрлэх чадалтай энэ машиныг өөрийнхөө гараар угсарчээ.
Р.Дамба гуай техникийн ямар нэгэн боловсрол эзэмшээгүй бөгөөд 1986 оноос хойш тэтгэвэрт гарах хүртлээ Хашаат сумын нэгдэлд тариачин хийж байжээ. Тэр хугацаандаа гинжит тракторыг дугуйтай болгосноос эхлээд маш олон машин техникийг угсарч өөрийнхөө хэрэглээнд ашигладаг болсон байна.
Энэхүү машинаа түлээ түлш, ус зөөх зэрэг өдөр тутмын хэрэгцээнд ашиглах зорилгоор хийсэн бөгөөд эвдэрч хэмхэрсэн машин, мотоциклийн мотор хропоор хийсэн учраас ямар ч нэгэн зардал гараагүй гэдгийг Р.Дамба гуай хэлсэн юм.
Хэд хоногийн өмнө Р.Дамба гуай энэхүү машинаа унаад Өвөрхангай аймгийн Хархорин сум орохоор явж байхад нь цагдаа зогсоожээ. Харин тэрхүү цагдаа машиных нь бичиг баримт, техникийн гэрчилгээг шаардаагүй бөгөөд яаж хийсэн болохыг нь ихэд сониучирхан харж байгаад явуулсан гэв.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.