ВИДЕО: ХХААХҮ-ийн сайд Ч.Улааныг огцрохыг шаардав

Улсаа аврах ард түмний үндэсний хөдөлгөөний зохицуулагч А.Эрдэнэбаяр, Б.Жагар нар ХХААХҮ-ийн Ч.Улаанд огцрох шаардлага хүргүүлж, тус яамны үүдэнд эсэргүүцлээ илэрхийллээ.

Ч.Улаан сайдад хүргүүлсэн шаардлагад “Таны эхнэрийн дүү Оросоогийн Даваасүрэн нь гааль, татварын дэд даргын албыг хашиж байсан ба “Бээжин интосикэйшн интернэшнл трейд монгол” гэдэг компанийг Хуанг Минг гэх БНХАУ-ын иргэнтэй хамтран үүсгэн байгуулж, хувьцаа эзэмшигчээр бүртгүүлсэн тус компанид бог малыг амьдаар экспортлох монополь эрхийг олгосон нь таныг албан тушаалаас нь огцруулах бүрэн үндэслэл болно. Ч.Улаан та шударга ёсыг уландаа гишгэж, харийнхны гар хөл болж, Монгол Улсын иргэдийг өндөр үнэтэй нөөцийн маханд очерлуулж,  харин БНХАУ-ын иргэдийн эрүүл энхийн төлөө Монгол малыг амьдаар нь гаргасан байх тул огцрохыг шаардаж байна” гэжээ.

Уг шаардлагыг гардан авахаар Ч.Улаан сайдын зөвлөх Р.Жадамбаа, ХХААХҮЯ-ны Төрийн захиргаа, удирдлагын газрын дарга  Т.Жамбалцэрэн нар иржээ. ХХААХҮ-ийн сайдын зөвлөх Р.Жадамбаа Засгийн газрын 2017 оны 318 дугаар тогтоолд “Мал сүргийн тоо толгойн өсөлт, бэлчээрийн даац, хадлан, тэжээлийн хүрэлцээ хангамжтай уялдуулан таваарын зориулалттайгаар малчид, иргэдийн орлогыг нэмэгдүүлэх зорилгоор малын гоц халдварт өвчин гараагүй аймаг, сумдаас үржлийн бус эр хонь, ямааны 20 хүртэл хувийг экспортлохыг зөвшөөрсүгэй” гэсэн байдаг. Гэхдээ энэ тогтоол өнөөдрийг хүртэл хэрэгжээгүй. Засгийн газрын өнөөдрийн хуралдаанаар малыг амьдаар нь экспортлох асуудлыг хэлэлцээд ард иргэд амьд мал гаргахыг эсэргүүцэж байгаа учраас уг тогтоолыг хүчингүй болгох асуудлыг ирэх долоо хоногийн хуралдаанаар хэлэлцүүлэх нь зүйтэй гэсэн шийдвэрийг гаргасан гэдгийг хэллээ.