Талийгаач өөрийгөө буудсан уу эсвэл...

Өнөө өглөө/2019.04.26/ 08:00 цагийн үед 100 айл орчимд нэгэн иргэн будуулсан байдалтай олдсон талаарх мэдээг бид хүргэсэн. Газар дээрээс нь шууд дамжуулан үзүүлсэн билээ.

Энэ хэрэгтэй холбоотойгоор Цагдаагийн ерөнхий газраас ч мэдээлэл хийж, гэрчүүдийг хайж байгаагаа онцолсон. 

Тэгвэл талийгаачтай холбоотой мэдээллүүд үргэлжлэн гарсаар байна. Тухайлбал, буудуулж нас барсан гэгдэж буй талийгаач 61 настай, Ж гэгч нь хүнд өвчтэй нэгэн байсан бөгөөд өчигдөр/2019.04.25/ "зуслангаас буугаа авч гараад өглөө үүрээр өөрийгөө буудсан бололтой" гэх таамаг ч гарч эхэллээ.

Мөн түүний өврөөс гэрээслэл олдсон учир амиа хорлосон байх ч магадлалтай хэмээн зарим хэвлэлүүд онцолж байна. Харин зарим нь түүний өвөрт гэрээслэл бус өвчнийх нь тухай тэмдэглэл байсан ч гэж нэг хэсэг нь онцолж байна. Түүнчлэн талийгаачийн гараас сумны дарь илэрсэн бөгөөд түүнийг үхэлд хүргэсэн зэвсэг нь хошууг тайрсан ТОЗ-8 маркийн буу гэдгийг Шүүхийн шинилжгээний газраас урьдчилан тогтоожээ. Гэхдээ хэргийн газарт буу байхгүй байсан нь анхаарал татахуйц хэрэг юм.

Дээрх мэдээллүүдийн аль нь ч албан ёсоор баталгаатай бус. Учир нь Шүүхийн шинжилгээний дүгнэлт гарч, Цагдаагийн байгууллагын шалгалт дууссаны дараа үнэн мөн нь бүрэн тодорхой болох юм.