Ким Жон Ун Владивостокт ирлээ
Умард Солонгосын залуу удирдагч Ким Жон Ун ОХУ дахь албан айлчлалаа эхлүүллээ. Тэрээр хувийн галт тэргээрээ Оросын хил давж Номхон далайн эргийн Владивосток хотод ирсэн байна.
Залуу удирдагч Ерөнхийлөгч Владимир Путинтай хийх уулзалт нь амжилттай болно гэдэгт итгэлтэй байна хэмээн Россия 24 телевизэд ярьжээ. Ким Жон Ун, Владимир Путин нарын анхны дээд хэмжээний уулзалт маргааш болно. Уулзалтын сэдэв Солонгосын хойгийг цөмийн зэвсэггүйжүүлэх хэмээн олон улсын хэвлэл мэдээллийн хэрэгслүүдээр дамжуулав.
Өрнөдийн хэвлэл мэдээллийн хэрэгслүүд энэ удаагийн уулзалтаар Умард Солонгосын залуу удирдагч өөрийгөө олон улсын чухал оролцогч болгон харуулахыг хүссэн хэмээн бичиж байна.
Удирдагч Кимийн тоноглосон галт тэрэг Хасаны галт тэрэгний зогсоол дээр зогсчээ. Хар өнгийн хүрэм, бүрх малгайтай удирдагчийг Орос үндэсний хувцастай охид баглаа цэцэг, уламжлал ёсоор талх давс барьж угтсан байна. Тэрээр ОХУ-д ирсэн даруйдаа галт тэрэгний буудлын орчимд байдаг Орос-Солонгосын нөхөрлөлийн ордонд зочилжээ. Уг ордныг 1986 онд Умард Солонгосын анхны удирдагч Ким Ир Сенийг ирэхэд Оросын тал барьж байгуулсан түүхтэй.
Эх сурвалж: www.reuters.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.