Парис хотын зочид буудлаас үнэт эдлэл дээрэмджээ
Франц улсын нийслэл Парис хотод байдаг Peninsula зочид буудлын нэг давхрын танхимд шилэн хоргонд хадгалагдаж байсан хагас сая ам.долларын үнэт эдлэлийг зэвэглэсэн этгээдүүд дээрэмджээ.
Нүүрээ халхалж баг зүүсэн дээрэмчдийн нэг нь зочид буудлын ажилтанд буу тулган нөгөө нь танхим дахь шилэн хоргыг сүхээр хагалж үзүүлэнд хадгалсан үнэт эдлэл, хувцсыг дээрэмдэж зугтсан байна.
Тэд гал нээж буун дуу гаргалгүй зугтсан ба хэргийн газарт гурав дахь дээрэмчин машинтай хүлээж байжээ.
Парис хотын цагдаа нар дээрэмчдийн зугтсан машиныг олсон боловч хэргийн газраас холгүй хотын баруун захад шатаасан байна. Мөрдөгчид хэргийг шалгаж эхэлжээ.
Францын нийслэлд урьд өмнө ийм төрлийн дээрмийн гэмт хэргүүд удаа дараалан гарч байсныг дурдвал өнгөрсөн жилийн нэгдүгээр сард Ritz зочид буудалд хутга, сүхтэй таван багтай дээрэмчин нэвтэрч шилэн хоргонд байсан 4,5 сая еврогийн үнэ бүхий үнэт эдлэлийг дээрэмджээ.
Мөн 2016 онд Парисын загварын долоо хоногийн үеэр Америкийн телевизийн шоуны од Ким Кардашиан түрээсийн байрлуугаа орох гэж яваад 10 сая еврогийн үнэт эдлэлээ буутай этгээдүүд дээрэмдүүлсэн нь шуугиан тарьж байсан юм.
Түүнчлэн 2015 онд Канны кино наадмын үеэр дөрвөн хулгайч 17,5 сая еврогийн үнэт эдлэл, бугуйн цагнуудыг хулгайлсан хэрэг гарч байжээ.
Эх сурвалж: www.theguardian.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.