Алагдсан сэтгүүлчийн хүүхдүүдэд 70 сая ам.долларын нөхөн төлбөр олгоно

Саудын Арабын сэтгүүлч Жамал Кашогги Туркийн Истанбул дахь Саудын консулын газарт ороод эргэж гарч ирэлгүй бусдын гарт амиа алдсан. Түүний хүүхдүүд эцгийнхээ аллагын нөхөн төлбөрт 70 сая ам.доллар авахаар болсон гэж CNN агентлаг дамжуулжээ.

Кашоггийн эзэмшиж байсан хөрөнгөн дээр сар бүрийн тэтгэмж олгохоос гадна аллагыг захиалсан хэдэн арван сая долларыг нөхөн төлбөрт авна гэж эх сурвалж мэдээлжээ. Хохирогчийн дөрвөн хүүхэд нэг бүрт дөрвөн сая ам.долларын байшин өгөхөөр болсон байна.

Том хүү Салах нь Саудын Жедда хотод банкинд ажилладаг бөгөөд уг хотод байдаг тансаг харшийг эзэмшихээр болжээ. Түүний дүү Абдулла, хоёр охин дүү нь мөн тус тусын харшийг нөхөн төлбөрт авна гэжээ. Түүнчлэн хүүхэд нэг бүрт 267,000 ам.долларыг нэг удаад өгч, сар бүр 10-15,000 долларын тэтгэмжийг тодорхойгүй хугацаагаар олгохоор болсон байна. Эдгээр нөхөн төлбөрийг Саудын хаан Салманы зөвшөөрлөөр олгожээ.

Кашогги Саудын эрх баригчдыг хурцаар шүүмжлэн дуу хоолойгоо дэлхийн нийтэд Вашингтон Пост сониноор дамжуулан хүргэдэг байсан ч түүний хүүхдүүд энэ талаар огт ам нээж байгаагүй.

Вашингтон Пост сонинд Саудын Засгийн газрыг шүүмжлэн нийтлэл бичдэг байсан Кашогги өнгөрсөн оны аравдугаар сарын 2-ны өдөр Саудын консулын байранд алагдсан хэрэгт 11 хүн буруутгагдсан юм. Эдгээрээс тавд нь ялын дээд хэмжээ буюу цаазаар авах ял оноохыг прокурорууд шаарджээ.

Сэтгүүлчийн аллагын гэмт хэрэг Саудын Араб, АНУ-уудын харилцаанд багагүй сэв суулгаж дэлхийн нийтээрээ анхаарлаа хандуулсан. АНУ-ын Ерөнхийлөгч Дональд Трамп хэрэгт холбогдуулан Саудын 17 эрхмийн эсрэг хориг тавьсан байдаг. Хэрэв гэмт этгээдүүдэд ялын дээд хэмжээ оноовол Саудын шүүх тогтолцоо шударга ажиллаж байгаагаа харуулна гэж ажиглагчид дүгнэжээ. 

Аллагыг угсаа залгамжлах хунтайж Мохаммед бин Салман захиалсан гэдэгт өрнөдийнхөн итгэлтэй байдаг. Кашоггийн том хүү Салах Америк-Саудын давхар иргэншилтэй ба нутагтаа амьдрахаар үлдсэн ганц хүүхэд нь ажээ.

Эх сурвалж: www.cnn.com