Өмнөговийн ШШГА-ны дэд даргын амь насыг хөнөөжээ

Өмнөговь аймаг дахь Шүүхийн шийдвэр гүйцэтгэх алба (ШШГА)-нд удирдах ажил хийж байсан хоёр ч хүн жил гаруйхны дотор амиа алдав. Хэдхэн хоногийн өмнө тус албаны дэд даргыг найман удаа хутгалж, амийг нь хороосон хэрэг өнгөрсөн долоо хоногт Хан-Уул дүүргийн нутаг дахь “Буянт-Ухаа-2” хороололд гарчээ.

Өмнөговь аймагт ажиллаж, амьдардаг тэрбээр хувийн ажлаа амжуулахаар түр чөлөө авч ирээд дээрх хороололд оршин суудаг найз Э-ындаа буусан аж. Улмаар түүнтэй сархад хэтрүүлэн хэрэглэж, хоорондоо маргалдсанаас энэ хэрэг гарчээ. Хан-Уул дүүргийн Цагдаагийн II хэлтсийн эх сурвалж “Ахуйн хүрээний архидалтаас үүдэлтэй хэрэг. Талийгаачтай ажил хэргийн ямар нэг маргаан болоогүй нь шалгалтаар тогтоогдож байна” гэсэн юм. ШШГЕГ-ынхан ч “Талийгаач ажлаасаа чөлөө авч амин хувийн ажлаар хотод ирсэн юм билээ. Энэ үед ийм харамсалтай хэрэг гарчээ. Цагдаагийн байгууллагынхан нарийвчлан шалгаж, чухам юунаас болж энэ хэрэг гарав гэдгийг тогтооно” гэлээ.

Одоогоос жил гаруйнхны өмнө Өмнөговь аймгийн ШШГА-ны дарга амиа хорлосон хэрэг гарч байсан юм. Тодруулбал, тус албаны дарга, хошууч Э 2018 оны гуравдугаар сарын 8-9-нд шилжих шөнө ажлын байрандаа очоод гар буугаараа эрүүндээ буудсан. Сум нүднийх нь орчмоор гарсан, аминаас нь холуур өнгөрсөн ч аймгийн Нэгдсэн эмнэлгийн Эрчимт эмчилгээний тасагт эмчлүүлж байгаад гурав хоногийн дараа нас барсан байдаг. Гэр бүлийн маргаанаас болж энэ хэрэг гарсан гэж орон нутгийн эх сурвалжууд тухайн үед мэдээлж байсан билээ.