Үсээ хараар будахыг шаардсан сургуулийн захиргааг шүүхэд өгчээ
Японы Осака мужийн ахлах сургуульд сурдаг 18 настай охин төрөлхийн бор өнгийн үстэй. Сургуулийнх нь захиргаа түүнийг үсээ хараар будахыг шаардсан байна. Төрөлхийн бор өнгийн үстэй охин шударга бус шаардлага тавьсан орон нутгийн сургуулийн захиргааг шүүхэд өгч 2,2 сая иен буюу 52 сая төгрөгтэй тэнцэхүйц хэмжээний мөнгө нэхэмжилжээ.
Сургуулийн удирдлага удаа дараа үсний өнгөө хар болгохыг шаардсанаас болж сурагч охин хиймэл үс зүүх болсон байна. Осака мужийн Кайфукан ахлах сургуульд охиныг элсэж ороход ээж нь төрөлхийн бор өнгийн үстэй гэдгийг нь хэлж байжээ. Тухайн үед охины үсний өнгө төрөлхийн учраас бүх сурагчид хар үстэй байх ёстой гэсэн сургуулийн дүрмийг зөрчихгүй гэж үзжээ.
Kyodo News агентлагийн дамжуулснаар солилцоогоор ирсэн гадны сурагчдыг ч мөн сургуулийн дүрмийг дагаж мөрдөхийг хүссэн байна. Шүүхэд хандсан Япон сурагч сургуулийн дарамт шахалтаас болж өнгөрсөн оны есдүгээр сараас хойш хичээлдээ ирээгүй гэжээ.
Японы ахлах сургуулиудад үсээ будах, нүүрээ будах, үнэт эдлэл зүүхийг хориглож, урт банзал өмсөх зэрэг дүрэм баримтлах нь нийтлэг аж. Энэ жилийн судалгаагаар Токиогийн сургуулиудад бор өнгийн үстэй сурагчдын 60 хув нь төрөлхийн гэдгээ баталсан байна. Мөн 170 сургуулийн 90 нь үсээ будаагүй гэдгээ нотолж нялх бага байх үеийн зургаа авчрахыг бор шаргал үстэй сурагчдаас шаарджээ.
Эх сурвалж: www.theguardian.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.