Өмнөд Солонгосын Ерөнхийлөгч асан Ли Мюн Бакыг тэрбум воны барьцаанд суллалаа

Өмнөд Солонгосын Ерөнхийлагч асан Ли Мюн Бакыг эрүүл мэндийн шалтгаанаар батлан даалтад суллах хүсэлтийг Сөүлийн дээд шатны шүүх өнгөрсөн нэгдүгээр сарын 29-ний өдөр хүлээж авчээ.

Хүсэлтийн дагуу 78 настай экс Ерөнхийлөгчийг тэрбум вон буюу 889,000 ам.доллараар өчигдөр сулласан байна.

Ерөнхийлөгчийг дүүгийнхээ нэр дээр байдаг компанийн жинхэнэ эзэн нь байсан ба төрийн тэргүүний эрх мэдлийн хүрээнд Samsung корпорациас 5,9 тэрбум воны хахууль авсан хэрэгт буруутгасан юм.

Ли Мюн Бакт өнгөрсөн оны 10 дугаар сард авилга, хээл хахуулийн хэргээр 15 жил хорих ял оноосон бөгөөд хорих газарт 349 хоногийг өнгөрөөсний дараа ийн суллажээ.

Ерөнхийлөгч асан хорих газарт байхдаа эрүүл мэндийн байдал нь эрс муудаж, шөнө унтаж чадахаа больсноор үс нь халцарч, хана түшиж алхаж байсан гэж эх сурвалжууд бичсэн байна.

Дээд шатны шүүх түүнийг батлан даалтад сулласан ч чанга дэглэмтэй гэрийн хорионд байх болзол тавьсан.

Гэрийн хорионд байх хугацаандаа зөвхөн хууль хяналтынхан, гэр бүлийнхэн нь холбоо харилцаа тогтоож тусгай зөвшөөрлөөр уулзах эрхтэй юм байна.

Гэрээсээ гарч, орохыг хориглосон ба хорионд байх хугацаа дуустал шүүх хурал болохгүй гэжээ.

Ли Мюн Бак нь 2008-2013 оны хооронд БНСУ-ын төрийн тэргүүний үүрэг гүйцэтгэсэн юм.

Өмнөд Солонгосын төрийн тэргүүнүүд авилга хээл хахууль, эрх мэдлээ урвуулан ашигласан хэргээр хоригдож байсан тохиолдол түгээмэл ч анх удаа батлан даалтад суллагдаж байна гэж зарим эх сурвалжид дурджээ.

Эх сурвалж: www.koreatimes.co.kr