Насанд хүрээгүй охидын эрүүл мэндийн асуудал буюу бэлгийн хүчирхийлэл, үр хөндүүлсэн байдал, бэлгийн замын өвчнийн тоон судалгаа жил ирэх тусам нэмэгдэх боллоо. Цагдаагийн байгууллагад бүртгэгдсэн, бэлгийн дур хүслээ ёс бусаар хангасан гэмт хэргийн хохирогчдын 46.8 хувь нь 0-17 насны охид. Тэдний 87 хувь нь ерөнхий боловсролын сургуулийн сурагчид тул охидын үзлэгийг дахин сэргээх талаар болон “Охидын бэлгийн халдашгүй байдлыг хангахад төр болон төрийн бус байгууллагын хамтын ажиллагааг бэхжүүлэх нь” сэдвээр зөвлөлдөх уулзалт зохион байгууллаа.

Охидын үзлэгийг сэргээхийг төрийн бус байгууллагууд эрс эсэргүүцэж байгаа бол төрийн байгууллагын зүгээс сэргээснээр бэлгийн хүчирхийлэлд өртөж буй далд хэлбэрийг ил гаргах боломжтой хэмээн үзэж байна.

 

 Охидын үзлэгийг дахин сэргээхээсээ илүү бага наснаас бэлгийн боловсролыг зөв зохистой менежмэнтээр явуулах шаардлагатай хэмээн төрийн бус байгууллагын зүгээс үзэж байна. Иймд бага наснаас хүчирхийллээс өөрийгөө хамгаалах арга зүйн мэдлэгийг олгох олон улсын практикийг 11 цэцэрлэгийн 4000 гаруй хүүхдэд заажээ.

 Зөвлөлдөх уулзалтын үеэр ерөнхий боловсролын сургуулийн сурагчдыг энэ төрлийн гэмт хэргээс урьдчилан сэргийлж, хохирсон бол эрт үед нь илрүүлэх, эмчийн болон сэтгэлзүйчийн тусламж цаг алдалгүй үзүүлэх шаардлага тулгараад байгаа талаар зөвлөлдөх уулзалтын үеэр дурдсан юм.

 

 

---