Маргааш “Эх орондоо хөдөлмөр эрхэлцгээе” үзэсгэлэн, яармаг болно

2018 оны 09 дүгээр сарын 14-ний өдөр буюу маргааш 13:00-17:00 цагийн хооронд МҮХАҮТ-ын Их тамхимд “Эх орондоо хөдөлмөр эрхэлцгээе” хөдөлмөрийн үзэсгэлэн, яармаг зохион байгуулагдана.

Нийслэлийн иргэдийн Төлөөлөгчдийн Хурлын Тэргүүлэгчдийн хурлаар батлагдсан “Нийслэлийн Залуучууд” дэд хөтөлбөрийн хүрээнд “Гадаад болон дотоодод сурч боловсрон, нарийн мэргэжил эзэмшсэн залуучуудын хөдөлмөр эрхлэлтийг дэмжих үйл ажиллагаа зохион байгуулах” зорилт дэвшүүлсэн юм.

Тус хөдөлмөрийн үзэсгэлэн яармагийг Гадаад харилцааны яам, Нийслэлийн Залуучуудын хөгжлийн газар, Монголын Үндэсний Худалдаа Аж Үйлдвэрийн Танхим (МҮХАҮТ), “Хилийн чанад дахь Монголчуудын зөвлөл” ТББ, “Гадаадад Төгсөгчдийн Нэгдсэн Зөвлөл” ТББ, хүний нөөцийн чиглэлээр үйл ажиллагаа явуулдаг “Шинэ хөгжлийн түлхүүр” ТББ-ууд хамтран зохион байгуулна.

Энэ үеэр үндэсний тэргүүлэгч 50 аж ахуй нэгж, байгууллагууд нээлттэй 500 ажлын байр зарлаж, эх орондоо хөдөлмөр эрхлэх боломж ба тулгамдаж буй асуудлаар мэдээлэл хийн, нээлттэй ярилцлага өрнүүлж, гадаадад төгсөгчид болон хилийн чанадад амьдарч буй иргэд эргэн ирэхэд хөдөлмөр эрхлэх боломж, нөхцөл байдлын талаар харилцан санал солилцож, хүний нөөцийн чиглэлээр зөвлөх үйлчилгээ үзүүлдэг зургаан байгууллага дэлгэрэнгүй мэдээлэл өгөх ажээ.

Энэхүү хөдөлмөрийн үзэсгэлэн яармагт гадаадад суралцаж, ажиллаж амьдарч байгаагүй залуучууд ч оролцох боломжтой.