“Алтан Дорнод Монгол” компанийн Ерөнхий захирал Т.Ганболд телевизээр Ерөнхий прокурор асан Д.Дорлигжавын дүү Д.Баатар болон Чангаагийн Бямбаа гэгч хүмүүс өөрийг нь рекэтэлсэн гэж ярьсан билээ. “Рекат Монголия” ХХК-ийн талаар тэрээр “Нэг үсгийг нь соливол Рекет болдог энэ компанийн их замын дээрэмчид намайг дарамталсан” гэж ярьсан.

Энд нэр дурдагдсан Чангаагийн Бямбаагийн тухай Т.Ганболд:

-Паушоктой авалцаж өгөлцөх гээд явж байтал дундаас нь хүмүүс гарч ирсэн. “Их замын дээрэмчин” зохиолорхуу дээрэмчид, гангестарууд гараад ирсэн. Чангаагийн Бямбаа гэж хүн байгаа. Энэ хүн өөрийгөө хэвлэлээр их гоёор тайлбарладаг. “Өдрийн сонин”-д хоёр нүүр дүүрэн ярилцлага өгчихсөн. Ярилцлагын гарчиг нь “Алтан хараацайн үүрэнд” гэж. Монголын ардчиллын алтан хараацай юм гэнээ, Чангаагийн Бямбаа нь. Тэгээд энэ сонинд тэнэг юм уу, эсвэл эзнээ алах өс хонзонтой юм уу “Би Д.Дорлигжавын бүх хар ажлыг хийж, хажууд нь явдаг” гэж ярьсан байсан. Ийм нэг нөхөр байдаг... гэж ярьсан.

Чангаагийн Бямбаа өмнө нь Хууль зүйн сайд асан Х.Тэмүүжингийн дөрвөн сая ам.долларын баримтын жиргээний араас хэвлэлийн бага хурал хийн гарч ирж, “эзнээ” өмөөрч байсан нь хэвлэлийн хуудаснаа үлджээ. Тэгэхээр тэр үнэхээр цагтаа мандаж явсан Д.Дорлигжавын баруун гар, “Алтан Дорнод Монгол” ХХК-ийг хэсэгхэн зуур өөрийн нэр дээр шилжүүлэн авч байсан хүн юмсанж.

Харин энэ удаад нийгэмд дуулиан тарьсан Т.Ганболдын ярилцлагын мөрөөр 2012 оны наймдугаар сард Чангаагийн Бямбаад 100 сая төгрөг өгөөд одоо болтол авч чадаагүй байгаа нэгэн манай редакцид хандсан юм.

Түүний ярьснаар компанийг нь татварын хэрэгт холбогдуулан шалгаж байсан ба тэр үеэр Ч.Бямбаатай найз нь танилцуулж, улмаар 100 сая төгрөг өгжээ. Гэвч Д.Дорлигжав уг хэрэгт нөлөөлсөн ч үгүй, хэрэг нь хэрэг биш болон замхарсан ба сүүлд нь Ч.Бямбаагаас мөнгөө нэхэхэд “Би чиний мөнгийг Д.Дорлигжавт өгсөн” гэсэн байна. Түүнээс дараахи зүйлийг тодруулсан юм.

-Яагаад зургаан жилийн дараа энэ хэргийг сөхөх болов?

-Алтан Дорнодын Т.Ганболдын ярилцлагыг үзсэн. Мөн Д.Дорлигжав нарт эрүү үүсгэн шалгаж байгаа учир энэ талаар  ярих цаг нь болсон гэж бодож байна. Д.Дорлигжавын баруун гар Чангаагийн Бямбаагаас одоо болтол 100 сая төгрөгөө авч чадахгүй байгаа. Мөнгөө нэхэхээр “Би тэр мөнгийг чинь Д.Дорлигжавт өгсөн” гэж хэлдэг. 9911452... дугаарын утастай байснаа түүнээс хойш дугаараа солиод, зугтаад байгаа. Сүүлд сонсох нь ээ, 8811-тэй дугаартай болсон ч залгахаар “Тийм хүн биш” гэдэг. Ч.Бямбаатай танилцуулсан, мөнгө өгөхөд хамт байлцсан найз маань хүртэл 15 сая төгрөгөө авч чадахгүй байгаа.  

Тухайн үед юу болсон бэ гэвэл манай компанийг татварын хэргээр шалгаж байсан. Ч.Бямбаа тэр үед Орхон аймгийн АН-ын орон нутгийн сонгуулийн Ерөнхий менежрээр томилогдсон байсан. “Намайг Д.Дорлигжав ийшээ яв гэсэн. Нам ялбал би Орхон аймгийн Засаг даргаар томилогдоно” гэж сайрхдаг байсан. Үнэхээр ч Д.Дорлигжав нь Орхоны АН-ыг баз, удирд гэж явуулсан юм шиг байна лээ. Тэрнээс сул гишүүн явсан хүнийг Орхоны Ан-ынхан юу гэж шууд сонгуулийн Ерөнхий менежерээр томилох вэ дээ.

“Улсын Ерөнхий прокурор байсан Д.Дорлигжаваар хэргийг чинь шийдүүлнэ. Дорлигоод мөнгийг чинь өгнө. Асуудалгүй” гэж хэлээд 100 сая төгрөгийг минь авсан. Та нар харж байгаа биз дээ, Дорлигоог дөрвөн сая ам.долларын авлига авсан байж магадгүй гэж хардангуут Ч.Бямбаа үсэрч гарч ирээд хэвлэлийн хурал хийж байгаа биз? Тэгэхээр одоо болтол холбоотой нь харагддаг. “Дорлигоо бид хоёр сонгуулийн одгүй, харин суудлын одтой” гэж их ярьдаг байсан.

-100 сая төгрөг өгсөн баримт нь байгаа юу?

-Байгаа байгаа. Мөнгө өгөхөд байлцсан хоёр гэрч нь ч байна. Бичлэг нь ч байгаа. Хэрэг маань хэрэг биш болоод, хэргийн үнэн мөн олдсоны дараа өгсөн мөнгөө авъя гэхэд “Дорлигоод өгсөн. Надад хамаагүй” гээд таг болсон.

Орон нутгийн сонгуулиар Орхоны АН ялсан боловч, Орхоны уугуул партизанууд нь мань нөхрийг Эрдэнэт үйлдвэрийн орлогч даргаас дээш явуулаагүй. Сүүлд нь үйлдвэрийн осолд буруутгагдаад, албан тушаалаас нь хуссан. 2016 онд Орхон аймгийн УИХ-ын сонгуульд бие даан нэр дэвшээд унасан. Ёстой л суудлын одгүй нөхөр байсан л даа.

-Найз чинь бас мөнгө өгөөд авч чадахгүй байгаа юм уу?

-Тийм. 100 сая төгрөгийг өгөхөд байлцсан найз маань хүртэл 15 сая төгрөгөө Ч.Бямбаагаас авч чадахгүй байгаа. Д.Дорлигжав нарыг саатуулан шалгах үеэр би ярилцлага өгье гэж бодож байсан боловч, хар нүхэнд хатаж байхад нь хүний муу үзээд яах вэ гээд хойшлуулсан. Цагаан сарын үеэр ч бас яриад яахав гэж өнгөрөөсөн. Иймээс одоо ярьж байна.   

100 саяын энэ хэргийг АТГ их сонирхож, одоо шалгаж байгаа хэрэгтэй хамтатгая гэж байна гэсэн. Найзтайгаа хамт өргөдөл өгье гэж ярилцаад байж байна.

-Ярилцсанд баярлалаа.

---