Д.Нарангэрэл: Халдварт менингитын гурван тохиолдол бүртгэгдсэн

Цахим орчинд хүүхдүүдийн дунд “Цахилгаан менингит”-ын тархалт ихэссэн тул сурагчдын амралтыг сунгах талаар яригдаж байна гэх мэдээлэл тархсан.

Энэ талаар ЭМЯ-ны Тандалт, шуурхай удирдлагын хэлтсийн дарга Д.Нарангэрэлээс тодруулсан юм.

Тэрбээр “Халдварт менингит өвчнөөр жилд 10-12 тохиолдол бүртгэгддэг. Энэ оны эхний нэгдүгээр сарын байдлаар гурван тохиолдол бүртгэгдсэн. Энэ жилийн хувьд харьцангуй намжмал байдалтай байна. Гэхдээ менингит нь хүн амын нягтрал ихтэй газар, агаар дуслын замаар халддаг учраас Цагаан сарын үеэр хүн ам тусах эрсдэлтэй гэдгийг сэрэмжлүүлье. Иймд хоолой, хамраа зайлах, гарын ариун цэврийг сахих хэрэгтэй. Одоогоор менингит өвчний дэгдэлт гэх зүйл гараагүй учраас сурагчдын амралтыг сунгах талаар яриагүй байна” гэсэн юм.

Цахилгаан менингит өвчин нь агаар дуслын замаар халдварлаж бүх насныхан болон 2-8 хүртэлх насны хүүхдүүд зонхилж өвчилдөг байна

Түүнчлэн манай улсад одоогоор улаанбурхан өвчний тохиолдол бүртгэгдээгүй бөгөөд өнгөрсөн онд нэг тохиолдол, 2017 онд 17 тохиолдол бүртгэгдсэн байна.

Цахилгаан менингит өвчин нь агаар дуслын замаар халдварлаж  бүх насныхан болон 2-8  хүртэлх насны хүүхдүүд зонхилж өвчилдөг байна. Менингококк нь гадаад орчинд амьдрах чадвараар маш сул нян юм. Тиймээс 60 градусын халуунд 10 минут, 80 градусын халуунд 2 минутын дотор үхдэг. Ариутгагч бодисын нөлөөгөөр 1-2 минутын дотор үхдэг. Тасалгааны дулаанд 1-3 цаг орчим, нарны гэрэлд 2-8 цаг амьдардаг. Өвчин үүсгэгч нян нь 36-37 градусын дулаанд үрждэг байна.