Төрийн захиргааны байгууллагад 400 мянга гаруй иргэн өргөдөл гомдол гаргажээ

Иргэдээс төрийн захиргааны төв болон нутгийн захиргааны байгууллага, албан тушаалтанд хандаж гаргасан өргөдөл гомдлын шийдвэрлэлтийн эхний хагас жилийн тайланг өнөөдрийн Засгийн газрын хуралдаанаар хэлэлцсэн байна. 

Эдгээр байгууллагуудад хандаж нийт 416 мянга гаруй иргэн өргөдөл, гомдол, санал, хүсэлт, шүүмжлэл гаргаснаас 402.795 иргэний өргөдлийг хуулийн хугацаанд нь шийдвэрлэж хариу өгсөн. Харин 998 өргөдөлд хариу өгөлгүй хугацаа хэтрүүлжээ. Нийт өргөдлийн 18 мянга 287 нь Засгийн газрын гишүүд болон яам, агентлагийн удирдлагад хаяглагдсанаас ХНХЯ хамгийн их буюу 78 мянга 800 гаруй өргөдөл гомдол хүлээж авсан бол ХХААХҮЯ хамгийн бага буюу 148 өргөдөл гомдлыг хүлээн авч шийдвэрлэсэн байна.

Аймаг орон нутагт Архангай аймгийн нутгийн захиргааны байгууллага, албан тушаалтнууд 36.308 өргөдөл гомдол, хүсэлт хүлээн авсан нь хамгийн өндөр үзүүлэлт бол Увс аймгийн иргэд хамгийн бага буюу 1700 гаруй өргөдөл гомдол, хүсэлт гарган шийдвэрлүүлжээ. Иргэдээс гаргасан өргөдлийн дийлэнх нь нийгмийн халамж хүссэн, цалин нэмэгдүүлэх шаардлага, өрхийн орлогоо шинээр тодорхойлуулах, газрын харилцаа, орон сууц, санхүүгийн дэмжлэг хүссэн утга бүхий байдаг ажээ.