УИХ-ын Тамгын газар ахмадуудаа хүлээж авлаа

Сар шинийн баярыг угтан УИХ-ын дэд дарга Л.Энх-Амгалан болон УИХ-ын Тамгын газрын удирдлагууд өнөөдөр Улсын Их Хурлын гишүүнээр сонгогдон ажиллаж байсан болон Тамгын газарт ажиллаж байгаад өндөр насны тэтгэвэрт гарсан ахмадуудаа хүлээн авч хүндэтгэл үзүүллээ.

Энэ үеэр УИХ-ын дэд дарга Л.Энх-Амгалан:

“Энэ парламент 2017 онд “Ахмад настны тухай” хуулийн шинэчилсэн найруулгыг баталснаас хойш ахмадуудын хөгжил, нийгмийн халамж, хамгааллын чиглэлд нэлээд ахиц дэвшил гарч байна. Тухайлбал, уг хуулийн хүрээнд УИХ-ын Тамгын газрын дэргэд “Ахмадын сан” байгуулсан. Энэхүү сан манай ахмадуудын амьдрал ахуйг дэмжих, гамдсан асуудлуудыг шийдвэрлэхэд түлхэц болох учиртай юм” гэдгийг  онцоллоо. 

Мөн тэрбээр “Монгол Улсын Үндсэн хуулийн нэмэлт, өөрчлөлт, Төрийн албаны шинэчлэл гээд онцгой анхаарал татсан, нэн чухал хууль тогтоомжийн төсөл, шийдвэрлэвэл зохих асуудлуудад төрд олон жил ажилласан ахмадууд та бүхний мэдлэг туршлага, үнэ цэнэтэй санал зөвлөмж чухал” гэдгийг дурдлаа.

“Ахмад настны тухай” Монгол Улсын хуулийг хамгийн сайн хэрэгжүүлж, үлгэр жишээ болж байгаа

Харин ахмадууд “Ахмад настны тухай” Монгол Улсын хуулийг хамгийн сайн хэрэгжүүлж, үлгэр жишээ болж байгаа байгууллага бол УИХ-ын Тамгын газар юм. Бид цаашид мэдлэг туршлага, санал бодлоо та бүхэнтэй хуваалцаж, хамтран ажиллахдаа баяртай байх болно гэдгээ илэрхийллээ.

УИХ-ын дэд дарга Л.Энх-Амгалан болон Тамгын газрын удирдлагууд ахмадуудад урт нас, удаан жаргалыг хүсэж, монгол түмний уламжлалт баяр Сар шинэдээ сайхан шинэлэхийг ерөөлөө.